অসমৰ অৰ্থনৈতিক বিকাশৰ নতুন পৰ্বৰ সূচনা কৰিবলৈ আগন্তুক ২৫ আৰু ২৬ ফেব্ৰুৱাৰীত গুৱাহাটীত অনুষ্ঠিত হ’ব “এডভাণ্টেজ আসাম ২.০” বিনিয়োগ সন্মিলন। এই অনুষ্ঠানৰ মূল উদ্বোধন কৰিব দেশৰ প্ৰধানমন্ত্ৰী নৰেন্দ্ৰ মোদীয়ে। মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বত অসম চৰকাৰে আয়োজিত এই কাৰ্যসূচীৰ জৰিয়তে ৰাজ্যই প্ৰায় ২ লাখ কোটিটকৈয়ে অধিক বিনিয়োগ আকৰ্ষণৰ লক্ষ্য স্থিৰ কৰিছে।

ঝুমুৰৰে সৈতে সাংস্কৃতিক মহৰত:
উদ্বোধনৰ পূৰ্বসন্ধিয়াত অর্থাৎ ২৪ ফেব্ৰুৱাৰীৰাতি গুৱাহাটীৰ সৰুসজাই ষ্টেডিয়ামত ১০ হাজাৰতকৈ অধিক ঝুমুৰ শিল্পীৰ এক বিৰল সাংস্কৃতিক অনুষ্ঠানৰ আয়োজন কৰা হৈছে, যাৰ উদ্বোধনো প্ৰধানমন্ত্ৰী মোদীয়েই কৰিব। ঝুমুৰৰ ঐতিহ্যবাহী নৃত্যসংস্কৃতিৰে অসমীয়া জনজীৱনৰ বৈচিত্ৰ্য বিশ্বদৰ্বাৰক উপস্থাপন কৰাত এই অনুষ্ঠানৰ উদ্দেশ্য।

বিজেপি কাৰ্যকৰ্তাৰ ভূমিকা:
ভাৰতীয় জনতা পাৰ্টি (বিজেপি)ৰ ৰাজ্যিক সভাপতি দিলীপ শইকীয়াই আজি ৰাজ্যিক দলীয় মুখ্য কাৰ্যালয় অটল বিহাৰী বাজপেয়ী ভৱনত অনুষ্ঠিত সভাত দলৰ কাৰ্যকৰ্তাসকলক এডভাণ্টেজ আসাম ২.০ৰ সফলতাক জনসমাজলৈ বিয়পাই নেওঁতাৰ ওপৰত গুৰুত্ব আৰোপ কৰে। মিডিয়া বিভাগ, সামাজিক মাধ্যম কোষ, তথ্য প্ৰযুক্তি, অৰ্থনীতি, বাণিজ্য, নীতি-গৱেষণা আদি সকলো বিভাগে এই কাৰ্যসূচীৰ প্ৰচাৰত সক্ৰিয়ভাৱে অংশগ্ৰহণৰ আহ্বান জনোৱা হৈছে।

উল্লেখযোগ্য উপস্থিতি:
এই বিনিয়োগ সন্মিলনত ভাৰতৰ আগশাৰীৰ কোম্পানী, ৰাষ্ট্ৰীয় উদ্যোগ, আন্তঃৰাষ্ট্ৰীয় সংস্থা, বিশিষ্ট ব্যৱসায়ীসকলৰ অংশগ্ৰহণে ইয়াৰ গুৰুত্ব অধিক বৃদ্ধি কৰিব বুলি আশা কৰা হৈছে। ৰাজ্যিক সাধাৰণ সম্পাদক পল্লৱলোচন দাস, দিপ্লুৰঞ্জন শৰ্মা, পুলক গোহাঁই আদি নেতৃবৃন্দে আজিৰ সভাত উপস্থিত আছিল। ৰাজ্যিক মুখ্য মুখপাত্ৰ মনোজ বৰুৱাৰ সঞ্চালনাত এই সভাত বিভিন্ন প্ৰস্তুতিৰ অগ্ৰগতিৰ ওপৰত আলোচনা কৰা হয়।

বিকাশৰ বাৰ্তা সকলোৰে দ্বাৰলৈ:
দলৰ নেতৃত্বই জোৰ দিছে যে এডভাণ্টেজ আসাম ২.০ৰ সুফল সাধাৰণ জনতালৈ প্ৰেৰণ কৰাটো বিজেপিৰ প্ৰতিজন কৰ্মীৰে প্ৰাথমিক দায়িত্ব। এই অনুষ্ঠানে অসমক এক বিনিয়োগৰ কেন্দ্ৰ হিচাপে গঢ়ি তুলিব বুলি আশাবাদী ৰাজ্যৰ নাগৰিক সমাজ।