গুৱাহাটী মহানগৰ প্ৰশাসন, আবকাৰী বিভাগ আৰু গুৱাহাটী আৰক্ষীৰ চকু খোল খাইছে৷ শেহতীয়াকৈ দীপাৱলীৰ নিশা খানাপাৰাত দুৰ্ঘটনাত পতিত হৈ দীপিত দে’ আৰু কনামিকা বসুমতাৰী নামৰ যুৱক-যুৱতীৰ মৃত্যু হয়৷ সেই নিশা এখন বাৰৰ পৰা ওলাই পিতৃয়ে কিনি দিয়া স্কৰপিঅ’ চলাই প্ৰাণ হেৰুৱাইছিল দীপিত দে’ আৰু কনামিকা বসুমতাৰীয়ে৷ আবকাৰী বিভাগ আৰু গুৱাহাটী আৰক্ষীয়ে দুৰ্ঘটনাৰ অন্যতম কাৰক বাৰসমূহক নাকী লগাবলৈ পণ লৈছে৷ আজি আবকাৰী আয়ুক্ত, আৰক্ষী আয়ুক্ত আৰু জিলা আয়ুক্ত আজি বাৰ-ৰেষ্টুৰেণ্টৰ মালিকৰ সৈতে বৈঠক অনুষ্ঠিত কৰে৷ আবকাৰী বিভাগে গুৱাহাটীৰ ওভতগোৰে নচা বাৰসমূহক নাকী লগোৱাৰ ইংগিত দিছে৷ এমাহৰ ভিতৰত সকলো বাৰ কৰ্তৃপক্ষক চিচিটিভি লগাবলৈ কঠোৰ নিৰ্দেশ দিছে৷ অত্যাধিক সুৰাপান কৰি মাতাল হোৱা লোকসকলৰ বাবে বিশেষ ব্যৱস্থা ৰাখিব লাগিব প্ৰতিখন বাৰে৷ মাতাল লোকজনক মাতাল অৱস্থাত গাড়ী চলাই ঘৰলৈ যাব দিব নোৱাৰিব বাৰ কৰ্তৃপক্ষই৷ তেনে লোকে ৰাস্তাত গাড়ী চলাই গ’লে চলোৱা লোকজনৰ লগতে বাৰ কৰ্তৃপক্ষ দায়ী হ’ব৷ প্ৰতিখন বাৰ কৰ্তৃপক্ষই বাৰত অতিৰিক্ত চালক মজুত ৰাখিব লাগিব৷ যদি কোনো গ্ৰাহকে গাড়ী চলাই যাব নোৱাৰা অৱস্থা হয় তেন্তে সেই গ্ৰাহকজনক বাবৰ চালকে গাড়ীখন চলাই ঘৰত থৈ আহিব লাগিব৷ আবকাৰী আয়ুক্ত, আৰক্ষী আয়ুক্ত আৰু জিলা আয়ুক্তই গুৰুতৰ অভিযোগ উত্থাপন কৰি গুৱাহাটীৰ বাৰ, ৰেষ্টুৰেণ্টত ড্ৰাগছৰ বেহা চলোৱাৰ অভিযোগ উত্থাপন কৰিছে৷ আৰক্ষী আয়ুক্তই কয় যে ব্যৱসায় কৰক৷ চৰকাৰে দিয়া নিয়মসমূহ মানি চলিব লাগিব। বহুতে নিয়ম মানিছে আৰু বহুতে মনা নাই৷ প্ৰশাসনক জগৰীয়া কৰি থাকিলে নহ’ব। লগতে তেওঁ অভিযোগ কৰা মতে, মহানগৰীৰ বহুকেইখন বাৰ এণ্ড ৰেষ্টুৰেণ্টত ড্ৰাগছ বিক্ৰী হয়। অপৰাধজনিত ঘটনাৰ তদন্তত এই কথা পোহৰলৈ আহিছে। কোন কোন বাৰত ড্ৰাগছ বিক্ৰী কৰা হয় সকলো ডাটা আছে আমাৰ লগত। এইখিনি অতি সোনকালে বন্ধ নকৰিলে বিহিত ব্যৱস্থা গ্ৰহণ কৰা হ’ব। বহু যুৱতী-মহিলা বাৰ বা ৰেষ্টুৰেণ্ট লৈ যায়। যুৱতীক সুৰা ফ্ৰীত দিয়ে। সুযোগ লৈ বহু যুৱতী বাৰসমূহলৈ যায় আৰু অচিনাক্ত ব্যক্তিক টাৰ্গেট কৰে। তাৰ পিছত যুৱতীগৰাকীৰ লগত বহু নহ’বলগীয়া ঘটনা হয়। ২০২২ চনত গুৱাহাটীত ২৫৩ জন লোকৰ মৃত্যু হৈছে আৰু আহত হৈছে ৫১২ জন৷ ২০২৩ চনত গুৱাহাটীত ২৬৭ জন লোকৰ মৃত্যু হৈছে আৰু আহত হৈছে ৫৩৫ জন৷ চলিত বৰ্ষত গুৱাহাটীত ২৬৯ জন লোকৰ মৃত্যু হৈছে আৰু আহত হৈছে ৮১৮ জন লোক আহত হৈছে৷