অৱশেষত সৰ্বানন্দ সোণোৱাল নামিল উপ-নিৰ্বাচনৰ প্ৰচাৰত৷ বিগত তিনিটা বছৰে সৰ্বানন্দ সোণোৱালে অসমত বিজেপিৰ সাংগঠনিক কাম-কাজৰ পৰা আতৰি আছে যদিও ২০২৬ চনৰ নিৰ্বাচনৰ পূৰ্বে পুনৰ সক্ৰিয় হৈছে৷ ৰাজ্যৰ ৫ সমষ্টিত অনুষ্ঠিত উপ-নিৰ্বাচনত সোণোৱালে নিৰ্বাচনী প্ৰচাৰ কৰিবলৈ আৰম্ভ কৰিছে৷ সৰ্বানন্দ সোণোৱালে শুকুৰবাৰে চিদলী বিধানসভা সমষ্টিত ইউপিপিএলৰ প্ৰাৰ্থীৰ হৈ নিৰ্বাচনী প্ৰচাৰ চলাই পাঁচোটা সমষ্টিত এনডিএ প্ৰাৰ্থী জয় লাভ কৰিব বুলি দাবী কৰিছে৷ ইউপিপিএলৰ প্ৰাৰ্থী নিৰ্মল কুমাৰ ব্ৰহ্মৰ হৈ প্ৰচাৰ চলাই সোণোৱালে কয় যে বিটিআৰত শান্তি স্থাপন হৈছে৷ উন্নয়ন হৈছে৷ এনডিএয়ে সমন্বয় সাধন কৰিছে। বসুগাঁৱত বিশাল ৰেলী সম্বোধন কৰি সৰ্বানন্দ সোণোৱালে কয় যে দেশৰ প্ৰতিটো কোণৰ বিকাশ কৰাটো এনডিএৰ মূলমন্ত্ৰ। চিদলী তথা বাসুগাঁও অঞ্চলৰ লোকসকলক বিশেষ আশ্বাস দিয়ে৷ ৰে’ল ভ্ৰমণৰ সুবিধাৰ বাবে বসুগাঁও ৰে’ল ষ্টেচনত ৰে’ল ৰখাৰ ব্যৱস্থা কৰিবলৈ ৰে’ল মন্ত্ৰীৰ সৈতে আলোচনা কৰিব বুলি কয়। উপ-নিৰ্বাচনৰ সভাত ইউপিপিএলৰ মুৰব্বী প্ৰমোদ বড়ো উপস্থিত থাকে৷