বৰাক উপত্যকাৰ ধলাই সমষ্টিত নিৰ্বাচনী প্ৰচাৰ চলাবলৈ যোৱাৰ সময়ত আজি গুৱাহাটী বিমান বন্দৰত অসম প্ৰদেশ কংগ্ৰেছ কমিটীৰ সভাপতি ভূপেন বৰাই সাংবাদিকৰে মুখামুখি হৈ অখিল গগৈক ভাল যোদ্ধা আখ্যা দিয়ে যদিও অস্ত্ৰ ভুলকৈ পৰিচালনা কৰা বুলি আক্ষেপ কৰিছে৷ অখিল গগৈ এজন ভাল যোদ্ধা, তাত মোৰ কোনো সন্দেহ নাই। কিন্তু যোদ্ধাই অস্ত্ৰ ভুল পৰিচালনা কৰিব নালাগে। যদি আপুনি এজন ভাল যোদ্ধা হ’ব বিচাৰে তেতিয়া আপুনি অস্ত্ৰটো কেতিয়া, কোন ফালে মাৰিব লাগে, কোন অস্ত্ৰ কাৰ গাত মাৰিব লাগে সেই কথা জানিব লাগে বুলি অখিল গগৈক উদ্দেশ্যে কয় ভূপেন বৰাই৷ ভূপেন বৰাই আৰু কয় যে এতিয়া উপ-নিৰ্বাচনত ৰাইজে বিজেপিক পৰাজিত কৰিব বিচাৰিছে৷ আমি যিবিলাক মানুহে বিজেপিৰ বিৰুদ্ধে যুঁজি আছো, সেইবিলাক মানুহে ৰাইজক কেতিয়াও বিভ্ৰান্ত কৰিব নালাগে৷ বিজেপি বিৰোধী যুঁজখনত আমি সকলোৱে আছো৷ কিন্তু আমি যদি কিছু কথা কৈ থাকো, তেতিয়া বিজেপি বিৰোধী মানুহে মনত আঘাত পাব৷ ৰাইজ বিভ্ৰান্ত হ’ব৷ তেতিয়া লাভ কাৰ হ’ব৷ বিজেপিৰ লাভ হ’ব পৰা, বিজেপি বিৰোধী মানুহখিনিয়ে অন্তৰত আঘাত পাব পৰা কোনো বক্তব্য বিজেপি বিৰোধী নেতাই দিব নালাগে৷ গৌৰৱ গগৈ আৰু ভূপেন বৰাৰ সংঘাতক লৈ সাংবাদিকে প্ৰশ্ন কৰাত উত্তৰত ভূপেন বৰাই কয় যে গৌৰৱ গগৈক আমাৰ দলে লোকসভাত উপ-দলপতিৰ দায়িত্ব দিছে৷ বিহালীত তেওঁক প্ৰচাৰৰ দায়িত্ব আমি দলেই দিছো৷ তেওঁ নিজেই বিহালীলৈ যোৱা নাই৷ অজিত সিঙক ধলাই, প্ৰদ্যুৎ বৰদলৈক বঙাইগাঁও, জাকিৰ হুছেইন সিকদাৰক ছিদলী আৰু ৰকিবুল হুছেইনক চামগুৰিৰ দায়িত্ব দিছো৷ সেই দায়িত্ব আমিহে দিছো৷ যেনেকৈ প্ৰদ্যুৎ বৰদলৈয়ে বঙাইগাঁৱত, ৰকিবুল হুছেইনে চামগুৰিত কাম কৰিছে তেনেকৈ গৌৰৱ গগৈয়ে বিহালীত কাম কৰি আছে৷ মই নিজেই সকলো সমষ্টিলৈ গৈ আছো৷ তাতে সংঘাতৰ কথা নাই৷