মুখ্যমন্ত্ৰী ড০ হিমন্ত বিশ্ব শৰ্মাই বাৰে বাৰে ৰাজ্যৰ স্বাস্থ্য খণ্ডৰ উন্নতি হোৱা বুলি দাবী কৰি আহিছে যদিও শেহতীয়া এক খবৰে ৰাজ্যৰ স্বাস্থ্য খণ্ডৰ প্ৰকৃত স্বৰূপ উদঙাই দিছে৷ এখন চিকিৎসা মহাবিদ্যালয় বন্ধ হ’বলৈ ওলোৱাৰ খবৰ প্ৰচাৰৰ পাছত চৰকাৰে দাবী কৰাৰ দৰে স্বাস্থ্য খণ্ডৰ উন্নয়ন হোৱা বুলি ক’ব নোৱাৰি৷ জানিব পৰা মতে, পাঞ্জাবাৰীস্থিত যাদৱ নাথ হোমিঅ’ পেথিক চিকিৎসা মহাবিদ্যালয় আৰু চিকিৎসালয়খন শীঘ্ৰে বন্ধ কৰা হ’ব৷ বৰ্তমান প্ৰায় ৩০০ ছাত্ৰই অধ্যয়ন কৰি থকা পাঞ্জাবাৰীস্থিত যাদৱ নাথ হোমিঅ’ পেথিক চিকিৎসা মহাবিদ্যালয়ৰ অৱস্থা অত্যন্ত বেয়া বুলি জানিব পৰা গৈছে৷ একমাত্ৰ পাঞ্জাবাৰীস্থিত যাদৱ নাথ হোমিঅ’ পেথিক চিকিৎসা মহাবিদ্যালয় আৰু চিকিৎসালয়খন ধ্বংস কৰিব খোজা হৈছে৷ হোমিঅ’ পেথিক চিকিৎসা মহাবিদ্যালয়ৰ এতিয়া মহ, ভেকুলীৰ বাসস্থান হৈছে৷ ১৯৭৫ চনত স্থাপিত হোমিঅ’ পেথিক চিকিৎসা মহাবিদ্যালয়খনৰ কদৰ্য্যময় অৱস্থা দেখা গৈছে৷

হোমিঅ’ পেথিক চিকিৎসা মহাবিদ্যালয় আৰু চিকিৎসালয়ত বৰ্তমান ৩০০ ছাত্ৰ-ছাত্ৰী আছে৷ বহু সপোন লৈ হোমিঅ’ পেথিক চিকিৎসা মহাবিদ্যালয়ত নামভৰ্তি কৰা ছাত্ৰ-ছাত্ৰীৰ এতিয়া পানীত হাঁহ নচৰা অৱস্থা৷ ৰোগীৰ চিকিৎসাৰ বাবে প্ৰায় ২৫ খন বিচনা ৰখা হৈছে৷ কিন্তু বিচনাত চিকিৎসা কৰা নহয়৷ কিয়নো বাৰিষাৰ ৬ মাহে পানীত ডুব যায় ৰোগী ৰখা কোঠা৷ যাৰ ফলত ৰোগী আহিবলৈ এৰিছে৷ ৰোগীৰ বাবে পূৰ্বে ঔষধ যোগান ধৰা হৈছিল৷ কিন্তু এতিয়া সময় সময়ে ঔষধ আহে যদিও ৰোগীৰ অভাৱত ঔষধৰ ম্যাক উকলি গৈছে৷ বহু ছাত্ৰ-ছাত্ৰীয়ে আধাতে শিক্ষা সমাপ্ত কৰিছে৷ কিয়নো শিক্ষকৰ অভাৱ, পাঠ্যক্ৰম প্ৰৱৰ্তন কৰা নহয়, খোৱাপানীৰ অভাৱ, আৱাসৰ অভাৱৰ বাবে বহু শিক্ষাৰ্থীয়ে যাদৱ নাথ হোমিঅ’ পেথিক চিকিৎসা মহাবিদ্যালয় আৰু চিকিৎসালয় এৰি গৈছে৷ সুবিধা নথকা পাঞ্জাবাৰীস্থিত যাদৱ নাথ হোমিঅ’ পেথিক চিকিৎসা মহাবিদ্যালয় আৰু চিকিৎসালয়ত হাতৰ ধন খৰছ কৰি কিছু ছাত্ৰই অধ্যয়ন কৰি আছে যদিও ভৱিষ্যত অন্ধকাৰ দেখিছে৷ যাৰ বাবে বৰ্তমান অধ্যয়নৰত ছাত্ৰ আৰু কৰ্মৰত শিক্ষকসকলে শীঘ্ৰে পাঞ্জাবাৰীস্থিত যাদৱ নাথ হোমিঅ’ পেথিক চিকিৎসা মহাবিদ্যালয় আৰু চিকিৎসালয়ক পুনজ্জীৱিত কৰিবলৈ দাবী উত্থাপন কৰিছে৷

চৰকাৰে ব্যয়বহুল এলোপেথিক পদ্ধতিত চৰকাৰে খৰছ কৰিছে ঠিকেই কিন্তু হোমিঅ’ পেথিক চিকিৎসাক অৱহেলা কৰিছে৷ ৰাজ্যৰ একমাত্ৰ হোমিঅ’ পেথিক চিকিৎসা মহাবিদ্যালয়ৰ দুৰৱস্থাই ৰাজ্য চৰকাৰখনৰ ফোপোলা স্বৰূপ উদঙাইছে৷ হোমিঅ’ পেথিক চিকিৎসা মহাবিদ্যালয়ৰ ঠাই খালী কৰি আন কিবা কামত লবলৈ চৰকাৰ যো-জা কৰা বুলি জানিব পৰা গৈছে৷ আয়ুৰ্বেদিক আৰু হোমিঅ’পেথিক চিকিৎসাৰ উন্নয়নৰ বাবে চৰকাৰে বিভিন্ন ধৰণৰ পদক্ষেপ লোৱাৰ কথা ঘোষণা কৰিছে। কিন্তু তেনে সময়তে অসমৰ ঐতিহ্যপূৰ্ণ হোমিঅ’পেথিক চিকিৎসা মহাবিদ্যালয়ক বন্ধ কৰাৰ ষড়যন্ত্ৰ কৰিছে অসম চৰকাৰে৷