শ্ৰীমন্ত শংকৰদেৱ হৈছে অসমীয়া জাতি- জাতিৰ সাহিত্য-সংস্কৃতি গঢ়োতা৷ সৰ্বগুণাকৰ শ্ৰীমন্ত শংকৰদেৱে সাংস্কৃতিক প্ৰমূল্যৰে নৱবৈষ্ণৱ ধৰ্ম প্ৰচাৰ কৰি অসমীয়া সমাজ-জীৱনক একত্ৰিত কৰিছিল। সেয়েহে
মহাপুৰুষ শ্ৰীমন্ত শংকৰদেৱ জগতগুৰু৷ শ্ৰীমন্ত শংকৰদেৱৰ চিন্তাধাৰা অবিহনে অসমীয়া জাতি শূন্য৷ ১৯৮৬ চনৰ পৰাই সাহিত্য, কলা, সংস্কৃতি, সাংবাদিকতা আদিৰ ক্ষেত্ৰত ৰাষ্ট্ৰীয় আৰু আন্তঃৰাষ্ট্ৰীয় খ্যাতি অৰ্জন কৰা ব্যক্তিক শ্ৰীমন্ত শংকৰদেৱ বঁটা আগবঢ়াই অহা হৈছে৷ মহাপুৰুষ শ্ৰীমন্ত শংকৰদেৱৰ আদৰ্শৰাজিক বিশ্বত দাঙি ধৰিবলৈ এই বঁটা প্ৰৱৰ্তন কৰা হৈছিল। বঁটাত নগদ ধন, প্ৰশংসা পত্ৰ, সোণৰ পদক, শৰাই আৰু অংগবস্ত্ৰ প্ৰদান কৰা হৈছিল৷ কিন্তু মুখ্যমন্ত্ৰী বিমন্ত বিশ্ব শৰ্মাৰ চৰকাৰে বঁটাৰ নামত ভেকোঁভাওনা কৰি গৈছে৷ ২০২১ চনত ৪ জানুৱাৰীত সৰ্বানন্দ সোণোৱাল চৰকাৰে শেষৰটো শ্ৰীমন্ত শংকৰদেৱ বঁটা প্ৰদান কৰিছিল৷ তাৰ পাছৰে পৰা হিমন্ত বিশ্ব শৰ্মা চৰকাৰে এই বঁটা প্ৰদান কৰিবলৈ আগ্ৰহ প্ৰকাশ কৰা নাই৷ জীৱনজোৰা অধ্যৱসায়, পাণ্ডিত্য, প্ৰজ্ঞাৰে চহকী একোজনকৈ লোকক ১৯৮৬ চনৰ পৰা ৰাজ্য চৰকাৰে প্ৰদান কৰিছিল ৰাষ্ট্ৰীয় পৰ্যায়ৰ শ্ৰীমন্ত শংকৰদেৱ বঁটা৷ অসম গণ পৰিষদৰ প্ৰফুল্ল কুমাৰ মহন্তৰ চৰকাৰে এই বঁটা প্ৰদান কৰি যোৱাৰ সিদ্ধান্ত লৈছিল৷ কিন্তু অসমীয়া জাতি গঠন কৰা শ্ৰীমন্ত শংকৰদেৱৰ নামত প্ৰদান কৰা বঁটা বন্ধ কৰি ৰাখিছে এইখন চৰকাৰে৷ শ্ৰীমন্ত শংকৰদেৱ বঁটা নিজ স্বকীয়তা আছে৷ এই পৰ্যন্ত ২৭গৰাকী মনীষীক এই বঁটা প্ৰদান কৰা হৈছে৷ তালিকাত ভূপেন হাজৰিকা, সত্যজিত ৰায়, মহেশ্বৰ নেওগ, চৈয়দ আব্দুল মালিক, হোমেন বৰগোহাঞিৰ দৰে পুৰোধা ব্যক্তিৰ নাম আছে৷