অসমীয়া সাহিত্য-সংস্কৃতি জগতলৈ অপূৰণীয় ক্ষতি কঢ়িয়াই বিশিষ্ট সাহিত্যিক, কবি, ঔপন্যাসিক, অভিনেত্ৰী গীতালী বৰুৱাই আজি অচিনাকি পথেৰে চিৰবিদায় ল’লে। ৰঙালী বিহুৰ প্ৰাক্ক্ষণত হৃদৰোগত আক্ৰান্ত হৈ গুৱাহাটীৰ এখন ব্যক্তিগত চিকিৎসালয়ত চিকিৎসাধীন অৱস্থাত তেখেতৰ মৃত্যু হয়। মৃত্যুৰ সময়ত তেওঁৰ বয়স আছিল ৬৪ বছৰ।

১৯৬১ চনৰ ১ জুলাইত জন্মগ্ৰহণ কৰা গীতালী বৰুৱাই বিলাসীপাৰাৰ বাসিন্দা হৈয়ে অসমীয়া সাহিত্যক গল্প, কবিতা, উপন্যাস, নাটক আদিৰে সমৃদ্ধ কৰিছিল। গুৱাহাটী বিশ্ববিদ্যালয়ৰ পৰা কলা শাখাত স্নাতক ডিগ্ৰী লাভ কৰা বৰুৱাই ২০০২ চনত প্ৰকাশিত তেওঁৰ প্ৰথম কাব্য সংকলন একুৰি অনুভূতিৰ জৰিয়তে সাহিত্যিক জীৱনৰ পাতনি মেলে। ইয়াৰ পিছত এবুকু অনুকম্পা, অদৃশ্য ডাকোৱাল, সৰিসৃপ মৌনতা, শান দিয়া জোন আদি কাব্য সংকলন, সাতখন গল্প সংকলন, কেইবাখনো উপন্যাস আৰু প্ৰবন্ধৰে সাহিত্যকৃষ্টিৰ মাজেদি পাঠক-সমালোচকৰ প্ৰশংসা অৰ্জন কৰে।

তৃতীয় শ্ৰেণীত পঢ়ি থাকোঁতে অভিমান নাটকত অভিনয়ৰ জৰিয়তে মঞ্চত আত্মপ্ৰকাশ কৰা বৰুৱাই পৰৱৰ্তী সময়ত বহুকেইখন নাটক আৰু চলচ্চিত্ৰতো অভিনয় কৰে। ১৯৮৭ চনত চিকিৎসক ড° অখিল কুমাৰ বৰুৱাৰ সৈতে বিবাহপাশত আৱদ্ধ হয়।

তেখেতে অসম সাহিত্য সভাৰ বিষ্ণুপ্ৰসাদ ৰাভা বঁটা, মাইকেল মধুসূদন বঁটা, অসম সাংস্কৃতিক মহোৎসৱৰ জীৱনজোৰা সাধনা বঁটা, এনাজৰী বঁটা আদি সন্মানেৰে বিভূষিত হৈছিল।

মৃত্যুৰ খবৰ প্ৰচাৰ হোৱাৰ লগে লগে তেওঁৰ বাসভৱনত গুণমুগ্ধ, সাহিত্য-সংস্কৃতিৰ কৰ্মী, বিভিন্ন সংগঠনৰ সদস্যসকল শ্ৰদ্ধাঞ্জলি জ্ঞাপন কৰিবলৈ উপস্থিত হয়। তেওঁৰ নশ্বৰ দেহত ফুলৰ মালাৰে শেষ বিদায় জনোৱা হয়। সাহিত্যিকসকলে তেওঁৰ মৃত্যুক “অসমীয়া সাহিত্যৰ এটা যুগৰ সমাপ্তি” বুলি কৈ শোক প্ৰকাশ কৰিছে।

গীতালী বৰুৱাই এৰি যোৱা সাহিত্য-ভাণ্ডাৰ আৰু সাংস্কৃতিক অৱদানে তেওঁক চিৰস্মৰণীয় কৰি ৰাখিব। তেওঁৰ আত্মাৰ শান্তি কামনা কৰি পৰিয়াললৈ সমবেদনা জ্ঞাপন কৰা হৈছে।