মুখ্যমন্ত্ৰীয়ে স্পষ্ট কৰি দিছে যে অসম গণ পৰিষদক সাংগঠনিক শক্তি চাইহে আসন এৰি দিয়া হ’ব৷ লগতে বিজেপিৰ দখলত থকা কমলপুৰ, পলাশবাৰী, ছিপাঝাৰ, ৰঙিয়া অগপক কোনো কাৰণত এৰি নিদিয়ে বিজেপিয়ে৷ বিজেপিৰ দখলত থকা কোনো সমষ্টি এৰি নিদিও বুলি স্পষ্ট কৰিছে মুখ্যমন্ত্ৰীগৰাকীয়ে৷ আজি সংবাদমাধ্যমৰ সৈতে মুখামুখি হৈ বিজেপিৰ দখলত থকা কোনো সমষ্টি অসম গণ পৰিষদে নাপায় বুলি কয় বিজেপিৰ অসমৰ মুখ্য নেতাগৰাকীয়ে৷ শেহতীয়াকৈ বিজেপিৰ বিৰুদ্ধে সক্ৰিয় অগপৰ জ্যেষ্ঠ নেতা কমলা কলিতা, জয়নাশ শৰ্মা আৰু সত্যব্ৰত কলিতাই কমলপুৰ, পলাশবাৰী, ছিপাঝাৰ, ৰঙিয়া দাবী কৰি আহিছে৷ মুখ্যমন্ত্ৰীয়ে আজি কয় যে বিজেপিৰ দখলত থকা কোনো সমষ্টি নাপায় অসম গণ পৰিষদে৷ পলাশবাৰী সমষ্টিত বিজেপি দলেই খেলিব৷ নেখেলাৰ প্ৰশ্নই উঠিব নোৱাৰে৷ আমাৰ চিটিং এমএলএ আছে৷ মই যদি কালি গৈ কও বোকাখাত সমষ্টিটো আমাক লাগে৷ সেয়া মিত্ৰতাৰ ধৰ্ম নহয়৷ যদি কমলা কলিতাই উঠিবই খোজে তেন্তে জালুকবাৰীত আহি উঠক৷ পলাশবাৰী বিজেপিৰ লগত আছে আৰু বিজেপিৰ লগত থাকিব৷ বোকাখাত, কলিয়াবৰ অগপৰ লগত আছে আমি সেই কেইটা নিবিচাৰো৷ ইপিনে অগপই ৪৪ খন আসন দাবী কৰিম বুলি কৈ অহাৰ কথাটো নস্যাৎ কৰি মুখ্যমন্ত্ৰীয়ে কয় যে আসন বিচাৰিলে আপত্তি কৰিবলগীয়া একো নাই৷ যি দলে যেনেকৈ সংগঠন কৰিব, যদি সংগঠনৰ শক্তি বৃদ্ধি পায় তেন্তে আমি এৰি দিম৷ আমি এটা বস্তু চাব লাগিব যে কোন দলৰ শক্তি আছে৷ বিৰোধীৰ বিধায়কে বিজেপিত যোগদান কৰিব নেকি সোধা এক প্ৰশ্নৰ উত্তৰ দি মুখ্যমন্ত্ৰীয়ে কয় যে বৰ্তমান সময়ত কোনো বিধায়কে বিজেপিত যোগদান নকৰে৷ যদি বিধানসভাৰ নিৰ্বাচনৰ আগতে যদি প্ৰয়োজন হয় তেন্তে কোনোবাই বিজেপিত যোগদান কৰিলে আমি আদৰণি জনাম৷ এইকেইদিন আমি বেছি ৰাজনীতি কৰি থাকিব খোজা নাই৷ কোনোবা এজন বিধায়কে যোগদান কৰিলে উপ-নিৰ্বাচনত দুমাহ শেষ হ’ব৷ তাৰ পিছত কেইদিন থাকিল৷ ডেৰটা বছৰ কাম কৰিব লাগে৷ কোনোবাই যদি যোগদান কৰিম বুলি ভাবি আছে তেন্তে জানুৱাৰী-ফেব্ৰুৱাৰীলৈ ৰৈ থাকক৷ এইকেইদিনত উপ-নিৰ্বাচন খেলি থাকিলে কাম কৰাৰ সময় নোহোৱা হ’ব৷ পঞ্চায়ত নিৰ্বাচন আৰু মিত্ৰতা ভংগক লৈ স্থিতি স্পষ্ট কৰি মুখ্যমন্ত্ৰীয়ে কয় যে আমাৰ সৈতে থকা মিত্ৰদলৰ সৈতে মিত্ৰতা নাভাঙে৷ যেনেকৈ আছো তেনেকৈ থাকিব৷ কিন্তু পঞ্চায়ত নিৰ্বাচনত স্থানীয় পৰ্যায়ত মিত্ৰতা হ’ব৷ ৰাজ্যিক পৰ্যায়ত নহয় সমষ্টি বা জিলা পৰ্যায়ত হ’ব৷ নলবাৰী, জালুকবাৰীত অগপৰ লগত কথা পাতিম৷