ড০ হিমন্ত বিশ্ব শৰ্মাৰ চৰকাৰে পিছপৰা আৰু আৰ্থিকভাবে দুৰ্বল অনুসূচিত জাতিৰ লোকসকলৰ বাবে বিভিন্ন আঁচনি ৰূপায়ন কৰি আহিছে৷ কিন্তু আঁচনিসমূহ ৰূপায়নৰ পাছতো অনুসূচিত জাতিৰ লোকসকল লাভৱান হ’ব পৰা নাই৷ এই অভিযোগ উত্থাপন কৰিছে অনুসূচিত জাতি সংগ্ৰামী যুৱ পৰিষদৰ সভাপতি সঞ্জীৱ দাসে৷ অনুসূচিত জাতি কল্যাণ সঞ্চালকালয়ত প্ৰায় ১৪০ কোটি টকাৰ ঘোটালা সংঘটিত হোৱাৰ খবৰ প্ৰচাৰ হোৱাৰ পাছতে নাৰাজ অনুসূচিত জাতি সংগ্ৰামী যুৱ পৰিষদৰ সভাপতি সঞ্জীৱ দাসে শীঘ্ৰে এই দুৰ্নীতিৰ তদন্ত ঘোষণা কৰিবলৈ দাবী উত্থাপন কৰিছে৷ অন্যথাই ১২ আগষ্টৰ ভিতৰত জংগী আন্দোলন গঢ়ি তোলাৰ ভাবুকি প্ৰদান কৰিছে৷

জানিব পৰা মতে, অনুসূচিত জাতিৰ লোকৰ মাজত প্ৰেছাৰ কুকাৰ, টিভি আৰু পাকঘৰৰ সামগ্ৰী প্ৰদান সিদ্ধান্ত লৈছিল ৰাজ্য চৰকাৰে৷ অনুসূচিত জাতি কল্যাণ সঞ্চালকালয়ে ৰূপায়ন কৰা এই আঁচনিৰ ধন ঠিকাদাৰক মুকলি কৰি দিয়া হৈছে যদিও আজিলৈ হিতাধিকাৰীয়ে সামগ্ৰী লাভ কৰা নাই৷ কিছু সংখ্যক হিতাধিকাৰীয়ে এই সামগ্ৰী লাভ কৰিছে যদিও সেয়া অতি নিম্নমানৰ আৰু ব্যৱহাৰৰ উপযোগী নহয়৷ অনুসূচিত জাতি সংগ্ৰামী যুৱ পৰিষদৰ বিভিন্ন সমিতিয়ে চৰজমিন তদন্ত মৰ্মে এই তথ্য লাভ কৰা বুলি দাবী কৰিছে দাসে৷

সভাপতি দাসে আৰু কয় যে আমি লাভ কৰা তথ্য মতে, প্ৰেছাৰ কুকাৰ, টিভি আৰু পাকঘৰৰ সামগ্ৰী প্ৰদানৰ নামত অনুসূচিত জাতি কল্যাণ সঞ্চালকালয়ৰ কাৰ্যালয়ত প্ৰায় ১৪০ কোটি টকাৰ দুৰ্নীতি সংঘটিত হৈছে৷ কাৰ্যালয়টোৰ একাংশ বিষয়াৰ ঘনিষ্ঠ ঠিকাদাৰক প্ৰতিবাৰে ঠিকা প্ৰদান কৰি এনেদৰে দুৰ্নীতি সংঘটিত কৰি গৈছে৷ যাৰ ফলত দশকৰ পাছক দশক ধৰি আৰ্থ-সামাজিকভাবে পিছপৰা অনুসূচিত জাতিৰ লোকসকল আঁচনিৰ দ্বাৰা উপকৃত হ’ব পৰা নাই৷ তদন্ত মৰ্মে এনে দুৰ্নীতিৰ সংঘটিত কৰা লোকসকলক চিনাক্তও কৰা নহয়৷

মুখ্যমন্ত্ৰীক এই ক্ষেত্ৰত স্মাৰক পত্ৰ কৰি তদন্ত দাবী উত্থাপন কৰা হ’ব বুলি উল্লেখ কৰি সঞ্জীৱ দাসে কয় যে অনুসূচিত জাতি কল্যাণ সঞ্চালকালয়ত প্ৰেছাৰ কুকাৰ, টিভি আৰু পাকঘৰৰ সামগ্ৰী প্ৰদানৰ নামত সংঘটিত কেলেংকাৰীৰ তদন্ত ঘোষণাৰ দাবী জনাম৷ এজন অৱসৰপ্ৰাপ্ত ন্যায়াধীশৰ দ্বাৰা গঠিত বিশেষ তদন্ত সমিতিৰ দ্বাৰা তদন্ত কৰিলে এই কেলেংকাৰীৰ সকলো জলজলপটপট হৈ পৰিব৷ দুৰ্নীতিত লিপ্ত অনুসূচিত জাতি কল্যাণ সঞ্চালকালয়ৰ বিষয়া আৰু ঠিকাদাৰক গ্ৰেপ্তাৰ কৰি শাস্তি দিয়াৰ ব্যৱস্থা কৰক৷