Brahmaputra Times
ডিজিটেল ডেস্কঃ বিভিন্ন শাখাৰ ৩২ খন খেল আৰু দহ হাজাৰৰো অধিক খেলুৱৈৰ অংশগ্ৰহণৰে প্ৰায় দুসপ্তাহজোৰা মন্ত্ৰমুগ্ধকৰ উন্মাদনাৰ অৱশেষত যৱনিকা পৰিল। ২০২৪ চনৰ পেৰিছ অলিম্পিকৰ সামৰণি পেলাই এইবাৰ পদকৰ শীৰ্ষস্থানত উপনীত হ’ল আমেৰিকা।
১৭ দিনৰ মন্ত্ৰমুগ্ধকৰ একচনৰ অন্ত পেলোৱা ৰোমাঞ্চকৰ চূড়ান্ত খেলখনত আমেৰিকাৰ মহিলা বাস্কেটবল দলে ফ্ৰান্সক ৬৭-৬৬ গ’লত পৰাস্ত কৰি গেমছৰ শেষৰটো সোণৰ পদক দখল কৰে। ইয়াৰ লগে লগে আমেৰিকান দলে চীনৰ সৈতে ৪০টাকৈ সোণৰ সৈতে সমতা স্থাপন কৰাটো নিশ্চিত কৰে।
অৱশ্যে আমেৰিকাই মুঠ ১২৬টা পদক লাভ কৰি সামগ্ৰিক পদক তালিকাৰ শীৰ্ষস্থান দখল কৰাৰ বিপৰীতে চীনে ৯১টা পদক লাভ কৰি দ্বিতীয় স্থানত আছে।
ইফালে ভাৰতে ৬টা পদক লাভ কৰি তালিকাৰ ৭১ সংখ্যক স্থান দখল কৰিবলৈ সক্ষম হয়। মল্লযুঁজাৰু বিনেশ ফ’গাটৰ অযোগ্য ঘোষণা বিতৰ্কৰ মাজতে এইবাৰ ভাৰতে অলিম্পিকত ৫টা ব্ৰঞ্জ আৰু এটা ৰূপৰ পদক অৰ্জন কৰে।
১৪০ কোটি জনসংখ্যাৰ দেশ ভাৰত। কিন্তু লক্ষণীয় কথাটো হ’ল অলিম্পিকত ভাৰতে লাভ কৰা পদকৰ সংখ্যা কেৱল মাথো ৬টা। ইয়াৰ বিপৰীতে মাত্ৰ ৩৩ কোটি জনসংখ্যাৰ দেশ আমেৰিকা যুক্তৰাষ্ট্ৰই ১২৬টা পদক লাভ কৰি পদকৰ তালিকাত শীৰ্ষস্থান দখল কৰিছে।
সমান্তৰালভাৱে ১.৭৭ কোটি জনসংখ্যাৰ দেশ নেদাৰলেণ্ডেও অলিম্পিকত দেখুৱাবলৈ সক্ষম হৈছে চমকপ্ৰদ প্ৰদৰ্শন। সৰু ৰাষ্ট্ৰখনে অলিম্পিকত ১৫টা সোণ, ৭টা ৰূপ আৰু ১২টা ব্ৰঞ্জৰ পদকসহ মুঠ ৩৪টা পদক লাভ কৰে।
জনসংখ্যাৰ দিশৰ পৰা বিশ্বৰ সৰ্ববৃহৎ দেশ হৈও আন্তঃৰাষ্ট্ৰীয় ক্ৰীড়া প্ৰতিযোগিতাত পদক জয়ী ভাৰতীয় খেলুৱৈৰ অভাৱে হতাশ কৰিছে দেশৰ কোটি কোটি জনতাক।
