Brahmaputra Times
ভাৰতীয় সেনাই পাকিস্তান আৰু পাকিস্তান অধিকৃত কাশ্মীৰত সন্ত্ৰাসবাদী ঘাঁটি লক্ষ্য কৰি চলোৱা অপাৰেশ্যন সেন্দূৰ-ৰ এদিনৰ পাছতে কেন্দ্ৰীয় চৰকাৰে আজি সকলো দলৰ নেতাৰে এক বৈঠক আহ্বান কৰে। এই বৈঠকখন ৰক্ষা মন্ত্ৰী ৰাজনাথ সিঙৰ অধ্যক্ষতাত অনুষ্ঠিত হয়। য’ত সকলো ৰাজনৈতিক দলৰ শীর্ষ নেতাসকল উপস্থিত থাকে।
উক্ত বৈঠকত কেন্দ্ৰীয় গৃহ মন্ত্ৰী অমিত শ্বাহ, বিত্ত মন্ত্ৰী নিৰ্মলা সীতাৰামণ, বৈদেশিক ব্যৱহাৰ মন্ত্ৰী ড॰ এছ. জয়শংকৰ, লোকসভাৰ বিৰোধী দলৰ নেতা ৰাহুল গান্ধী, কংগ্ৰেছ সভাপতি মল্লিকার্জুন খাৰ্গে, তৃণমূল কংগ্ৰেছৰ সুদীপ বন্দ্যোপাধ্যায়, ডিএমকে নেতা টি. আৰ. বালু আৰু বিভিন্ন দলৰ নেতাসকলে অংশ লয়।
ৰাজনীতি নহয়, ৰাষ্ট্ৰ মূল লক্ষ্য
বৈঠকৰ পিছত সংসদীয় বিষয়ক মন্ত্ৰী কিৰেণ ৰিজিজুৱে সংবাদ মাধ্যমক জনায়, “চৰকাৰে সকলো দলক অপাৰেশ্যন সেন্দূৰ সম্পৰ্কে বিস্তাৰিতভাৱে অৱগত কৰিছে। সকলো দলেই সেনাবাহিনীক অভিনন্দন জনাইছে আৰু গঠনমূলক পৰামৰ্শ আগবঢ়াইছে।”
তেওঁ কয়, “এই সময়ত সকলো নেতাই বুজি পাইছে যে ই ৰাজনীতি কৰাৰ সময় নহয়। ৰক্ষা মন্ত্ৰী ৰাজনাথ সিঙে স্পষ্টকৈ কয়, ‘আমাৰ ৰাজনীতি চৰকাৰ গঠন কৰিবলৈ নহয়, ৰাষ্ট্ৰ গঠন কৰিবলৈ।’”
বিপক্ষৰ দ্ব্যর্থহীন সমৰ্থন, যদিও প্ৰধানমন্ত্ৰীৰ অনুপস্থিতিত খাৰ্গেৰ প্ৰশ্ন
কংগ্ৰেছ সভাপতি মল্লিকার্জুন খাৰ্গে সংবাদ মাধ্যমত কয়, “অপাৰেশ্যনৰ কেইটামান গুৰুত্বপূর্ণ দিশ চৰকাৰে আমাক সদৰি কৰিছে, কিন্তু ৰাষ্ট্ৰীয় সুৰক্ষাৰ স্বাৰ্থত সকলো তথ্য প্ৰকাশ কৰিব নোৱাৰি।” তেওঁ লগতে কয়, “এই কঠিন সময়ত আমি চৰকাৰক আশ্বাস দিছোঁ যে ৰাষ্ট্ৰীয় স্বাৰ্থত আমি সকলো একত্ৰিতভাৱে চৰকাৰৰ সৈতে আছোঁ।”
তেওঁ আন এক মন্তব্যত কয়, “নৰেন্দ্ৰ মোদী এই বৈঠকখনত অনুপস্থিত আছিল। হয়তো তেওঁ ভাবিছে তেওঁ সংসদৰ ওপৰত। যদিও এতিয়া সমালোচনাৰ সময় নহয়।”
ৰাহুল গান্ধীৰ সমৰ্থন, ওৱাইছীৰ কূটনৈতিক আহ্বান
লোকসভাৰ বিৰোধী দলৰ নেতা ৰাহুল গান্ধী কয়, “আমি সম্পূৰ্ণ সমৰ্থন আগবঢ়াইছোঁ, আৰু খাৰ্গে জীয়ে যি কৈছে সেয়া সঠিক। কিছুমান কথা আলোচনা কৰিব নালাগে, এইটো সকলো বুজিছে।”
AIMIM নেতা আসাদুদ্দিন ওৱাইছী অপাৰেশ্যনৰ প্ৰশংসা কৰি চৰকাৰে কূটনৈতিক মঞ্চতো তৎপৰ হোৱাৰ আহ্বান জনায়। তেওঁ কয়, “TRF (The Resistance Front)ক ৰাষ্ট্ৰসংঘ আৰু আমেৰিকাই সন্ত্ৰাসবাদী সংগঠন হিচাপে ঘোষণা কৰা উচিত। ২০২৫ৰ ফেব্ৰুৱাৰীত হাফিজ ছইদৰ পুত্ৰ হাফিজ আব্দুল ৰউফে PoK-ত বছৰৰ জিহাদ চলোৱাৰ ঘোষণা কৰিছিল।”
কাশ্মীৰবাসীৰ বাবে সহানুভূতি আৰু সহায়ৰ দাবী
ওৱাইছীয়ে কয়, “পুঞ্চত যিসকল নিৰীহ লোকে প্ৰাণ হেৰুৱালে, তেওঁলোকক সন্ত্ৰাসবাদৰ বলি হিচাপে স্বীকৃতি দিয়া হ’ক। চৰকাৰে তেওঁলোকক ক্ষতিপূৰণ আৰু ঘৰ নিৰ্মাণৰ ব্যৱস্থা কৰিব লাগিব।”
