গুৱাহাটীঃ কলকাতাৰ মহিলা চিকিৎসকৰ সৈতে সংঘটিত জঘন্য কাণ্ডক লৈ দেশজুৰি প্ৰতিবাদ অব্যাহত থকাৰ সময়তে এইবাৰ অসম মুলুকত যৌন নিৰ্যাতনৰ বলি হ’ল আন এগৰাকী ছাত্ৰী। নগাঁৱৰ ধিঙত এগৰাকী কিশোৰী ছাত্ৰীক ধৰ্ষণ কৰি ৩ দুৰ্বৃত্তই পেলাই থৈ গ’ল পথৰ দাঁতিত। এই ঘটনা পোহৰলৈ অহাৰ পিছতে সজোৰে উঠিছে প্ৰতিবাদৰ জোৱাৰ।

নাবালিকাৰ সৈতে ধিঙত সংঘটিত এই দলবদ্ধ ধৰ্ষণ কাণ্ডৰ বিৰুদ্ধে অৰ্নিদিষ্টকালীন ধিং বন্ধ ঘোষণা কৰিছে সদৌ অসম ছাত্ৰ সন্থাই।

জানিব পৰা মতে, এই অমানৱীয় কাণ্ড সংঘটিত হৈছে ধিঙৰ ভকতগাঁৱত। দশম শ্ৰেণীৰ ছাত্ৰীগৰাকীয়ে সন্ধিয়া টিউচনৰ পৰা উভতি অহাৰ সময়তে ৩ দুৰ্বৃত্তই বলপূৰ্বক ধৰ্ষণ কৰি পথৰ দাঁতিত পেলাই থৈ যোৱাৰ অভিযোগ উত্থাপন হৈছে। ইফালে পিছত একাংশ স্থানীয় লোকে পথৰ দাঁতিত উলংগ অৱস্থাত কিশোৰীগৰাকীক প্ৰত্যক্ষ কৰি খবৰ দিয়ে আৰক্ষীক। লগে লগে আৰক্ষী উপস্থিত হৈ নাবালিকাগৰাকীক উদ্ধাৰ কৰে আৰু ধিং চিকিৎসা কেন্দ্ৰলৈ প্ৰেৰণ কৰে। অৱশ্যে পৰৱৰ্তী সময়ত উন্নত চিকিৎসাৰ বাবে নাবালিকাগৰাকীক নগাঁও চিকিৎসা মহাবিদ্যালয়লৈ প্ৰেৰণ কৰা হয় ।

এই ঘটনাৰ পিচতে ধিঙত তীব্ৰ উত্তেজনাৰ সৃষ্টি হৈছে। কলকাতা কাণ্ডক লৈ দেশজুৰি প্ৰতিবাদ অব্যাহত থকাৰ সময়তে ধিঙত সংঘটিত এই ধৰ্ষণকাণ্ডই পুনৰ এবাৰ মহিলাৰ সুৰক্ষাৰ ওপৰত প্ৰশ্ন উত্থাপন কৰিছে। ধিঙৰ মাজমজিয়াত ফুট গধূলি সংঘটিত এই ধৰ্ষণকাণ্ডৰ পিচতে স্থানীয় সংগঠন আৰু ৰাইজ উত্তেজিত হৈ পৰে। নিশা সদৌ অসম ছাত্ৰ সন্থাৰ লগতে স্থানীয় একাংশ লোকে দোষীক শীঘ্ৰে গ্ৰেপ্তাৰৰ দাবীত প্ৰতিবাদ সাব্যস্ত কৰে।

কেৱল এয়াই নহয় নিশাৰ ভিতৰতে ধৰ্ষণকাৰীক গ্ৰেপ্তাৰ কৰাৰো দাবী তোলে প্ৰতিবাদকাৰীয়ে। একেদৰে ধৰ্ষণকাৰীক গ্ৰেপ্তাৰ নকৰা পৰ্যন্ত ধিং বন্ধৰো ঘোষণা কৰে আছুৱে। আছুৱে ঘোষণা কৰা মতে এই সময়ছোৱাত সকলো ব্যৱসায়িক প্ৰতিষ্ঠান বন্ধ ৰাখিব লাগিব। যান-বাহনৰ চলাচলো বন্ধ থাকিব। ইফালে নগাঁও আৰক্ষীয়ে নিশাৰে পৰা অভিযান অব্যাহত ৰাখিছে। কিন্তু এতিয়ালৈ আৰক্ষীয়ে ধৰ্ষণকাৰীক গ্ৰেপ্তাৰ কৰিবলৈ সক্ষম হোৱা নাই।