ৰাজ্যৰ ১৮ খন জিলাত আজি বিয়লি ৪ বজাৰ সময়ত একেলগে মকড্ৰিল (সামৰিক অভ্যাস) অনুষ্ঠিত হয়। সমগ্ৰ দেশৰ লগতে অসমতো ভাৰত চৰকাৰৰ নিৰ্দেশ অনুসৰি এই মকড্ৰিল সম্পন্ন কৰা হয়।

ভাৰতীয় সেনাই ৬ মে’ নিশা পাকিস্তান অধিকৃত কাশ্মীৰত এয়াৰ ষ্ট্ৰাইক চলোৱাৰ পিছতেই ৭ মে’ৰ বাবে স্থিৰ কৰা মকড্ৰিল  কৰা হয়। নিশা ১ বজাৰ পৰা ১.৩০ বজালৈ অনুষ্ঠিত এই অপাৰেশ্যন সেন্দূৰত পাকিস্তানৰ ৯টা স্থলত এয়াৰ ষ্ট্ৰাইক চলাই সন্ত্ৰাসবাদীৰ স্থাপনাত আক্ৰমণ চলোৱা হয়।

অসমত অনুষ্ঠিত মকড্ৰিলত গুৱাহাটী, বঙাইগাঁও, ধুবুৰী, গোৱালপাৰা, যোৰহাট, শিৱসাগৰ, তিনিচুকীয়া, তেজপুৰ, ডিগবৈ, দুলীয়াজান, ৰঙিয়া, নামৰূপ, নাজিৰা, উত্তৰ লখিমপুৰ, দৰং, নুমলীগড়, গোলাঘাট, কাৰ্বি আংলং আৰু কোকৰাঝাৰ অন্তৰ্ভুক্ত আছিল।

এই মকড্ৰিলত ভাৰতীয় সেনাৰ উপৰিও অসম আৰক্ষী, বিদ্যালয়-মহাবিদ্যালয়ৰ ছাত্ৰ-ছাত্ৰী, এনচিচি, স্বাস্থ্য বিভাগ, অসামৰিক বিভাগ, এছডিআৰএফ আৰু বিভিন্ন ৰাজনৈতিক ব্যক্তিত্বে অংশগ্ৰহণ কৰে। ৰঙিয়া ৰেল ষ্টেশনত দিলীপ শইকীয়া আৰু বিধায়ক ভৱেশ কলিতাই উপস্থিত থাকিলেও মুখ্যমন্ত্ৰী হিমন্ত বিশ্ব শৰ্মাই জালুকবাৰী সমষ্টিত ভোটদান কৰি মকড্ৰিলৰ বিষয়ে প্রতিক্ৰিয়া দিয়ে।

মুখ্যমন্ত্ৰীয়ে কয়, “অপাৰেশ্যন সেন্দূৰৰ জৰিয়তে ভাৰতীয় সেনাই সন্ত্ৰাসবাদীৰ বিৰুদ্ধে নিৰ্ণায়ক পদক্ষেপ গ্ৰহণ কৰিছে। এই পৰিস্থিতিত সকলো ভাৰতীয়য়ে একতা বজাই ৰাখি সেনা আৰু চৰকাৰৰ সৈতে থিয় হ’ব লাগিব।”

তেওঁ লগতে কয় যে সময়-সময়ত এনে মকড্ৰিল অনুষ্ঠিত হোৱা উচিত। বহুদিন ধৰি অসমত এনে অভ্যাস কৰা হোৱা নাছিল বুলি মন্তব্য কৰে মুখ্যমন্ত্ৰীগৰাকীয়ে।

উল্লেখযোগ্য যে, দেশজুৰি যিকোনো আকস্মিক যুদ্ধ পৰিস্থিতিত নাগৰিকসকলক সজাগ আৰু সুৰক্ষিত ৰাখিবলৈ এই ধৰণৰ মকড্ৰিল অতি জৰুৰী বুলি প্ৰশাসনে জানিবলৈ দিয়ে।