মন্ত্ৰী পীয়ুষ হাজৰিকাই এডভাণ্টেজ আছাম ২.০ৰ দ্বিতীয় দিনাৰ বিনিয়োগ আলোচনা সভাত অসমক উদ্যোগিক ভাবে শক্তিশালী ৰাজ্য হিচাপে গঢ়ি তোলাৰ লক্ষ্যৰ কথা ঘোষণা কৰে। তেওঁ উল্লেখ কৰে যে অসম এতিয়া “বন্ধৰ ৰাজ্য” বা “আইন-শৃংখলাৰ সমস্যাগ্ৰস্ত” অঞ্চল নহয়, বৰঞ্চ ছেমিকণ্ডাক্টৰ উৎপাদনৰ দিশত আগবাঢ়ি আছে। জাগীৰোডত গঢ়ি উঠা ছেমিকণ্ডাক্টৰ প্ৰকল্পৰ পৰা এই বছৰৰ শেষলৈকে চিপছ উৎপাদন আৰম্ভ হ’ব বুলি জনোৱা হৈছে। প্ৰকল্পটোৱে দুবছৰৰ ভিতৰত দৈনিক ৪৮ মিলিয়ন চিপছ উৎপাদন ক্ষমতা লাভ কৰিব।

ইয়াৰোপৰি, টাটা গ্ৰুপে অসমত ম’বাইল মেনুফেকচাৰিং ইউনিট স্থাপনৰ সম্ভাৱনাৰ কথা উল্লেখ কৰি হাজৰিকাই যুৱসমাজক চাকৰিৰ সৈতে নিজা উদ্যোগ গঢ়াৰ আহ্বান জনায়। ষ্টাৰ্টআপ আৰু উদ্ভাৱনী প্ৰকল্পৰ বাবে চৰকাৰে এক নতুন বিভাগ সৃষ্টি কৰি ২০২৪-২৫ৰ বাজেটত ১০০ কোটি টকাৰ ফাণ্ড বিনিয়োগৰ ঘোষণা কৰা হৈছে। “অসমক ষ্টাৰ্টআপৰ হাবলৈ ৰূপান্তৰিত কৰিম,” বুলি মন্ত্ৰীজনে আশাবাদ ব্যক্ত কৰে।

উত্তৰ-পূৰ্বাঞ্চলৰ সুৰক্ষাৰ ক্ষেত্ৰত মুখ্যমন্ত্ৰী হিমন্ত বিশ্ব শৰ্মাৰ ডিফেন্স কৰিড’ৰৰ ধাৰণাক সমৰ্থন জনাই হাজৰিকাই কয়, “শত্ৰুৰাষ্ট্ৰৰ সান্নিধ্যৰ বাবে এই অঞ্চলত প্ৰতিৰক্ষা সজুলি মেৰামতিৰ সুবিধা গঠন কৰাটো জৰুৰী।” ইয়াৰোপৰি, অসমক কেন্দ্ৰীয় সাহায্যনিৰ্ভৰ ৰাজ্যৰ পৰা কেন্দ্ৰলৈ অৰ্থসহায় আগবঢ়োৱা ৰাজ্যলৈ ৰূপান্তৰিত কৰাটো মুখ্যমন্ত্ৰীৰ প্ৰধান লক্ষ্য বুলি তেওঁ উল্লেখ কৰে।

শেহতীয়াকৈ, বিদেশী বিনিয়োগকাৰীসকলক অসমলৈ বিনিয়োগৰ বাবে আমন্ত্ৰণ জনাই হাজৰিকাই কয়, “অসমীয়াই চাকৰিৰ বাবে অন্য ৰাজ্যলৈ যাব নালাগে। এডভাণ্টেজ আছাম ২.০ই ইয়াতেই সুযোগৰ সৃষ্টি কৰিব।”