বিহালীৰ তিনিসুঁতি আৰক্ষী চকীৰ অন্তৰ্গত অসম-অৰুণাচল সীমান্তৰ বগীজুলীৰ অঞ্চলত শংকৰ পেগু (২৯) নামৰ এজন যুৱকক অৰুণাচল প্ৰদেশত নৃশংসভাৱে হত্যা কৰা ঘটনা পোহৰলৈ আহিছে। অভিযোগ অনুসৰি, ১৩ জুলাই তাৰিখে অৰুণাচলৰ ৰয়িং-ডিবাং ভেলীৰ তাদাৰ ভাই নামৰ এজন স্থানীয় ব্যৱসায়ীয়ে শংকৰক গুলীয়াই হত্যা কৰে। গুলী মূৰত আৰু ভৰিত লাগি ঘটনাস্থলীতেই মৃত্যু ঘটে শংকৰৰ।

জানিব পৰা মতে, শংকৰ প্ৰায় ২০ দিন পূৰ্বে শ্ৰমিক হিচাপে কাম কৰিবলৈ অৰুণাচল প্ৰদেশৰ ৰয়িং অঞ্চললৈ গৈছিল। ১৪ জুলাই নিশা অৰুণাচল প্ৰদেশ আৰক্ষীয়ে অসম আৰক্ষীৰ সহযোগত বিহালীৰ বগীজুলীস্থিত শংকৰৰ পৰিয়াললৈ মৃতদেহটো চমজাই দিয়ে।

এই হত্যাকাণ্ডে অঞ্চলজুৰি তীব্ৰ প্ৰতিবাদৰ সঞ্চাৰ কৰিছে। বিশেষকৈ, অৰুণাচলত অসমীয়া যুৱকসকলৰ ওপৰত ধাৰাবাহিকভাৱে হোৱা আক্ৰমণৰ ঘটনা নতুনকৈ উদ্বেগৰ সৃষ্টি কৰিছে। উল্লেখযোগ্য যে, ১৮ জুনতো অৰুণাচলৰ চিম্ফুৰ ইটানগৰত টাই জ’ন নামৰ এজন লোকে অসমৰ প্রভাষ দলে (২২) নামৰ এজন যুৱকক মাৰপিট কৰি হত্যা কৰিছিল।

এই সম্পৰ্কে ক্ষুব্ধ প্ৰতিক্ৰিয়া ব্যক্ত কৰি মিচিং জনগোষ্ঠীৰ তিনিটা সংগঠন — টিএমপিকে (TMPK), এমএমকে (MMK) আৰু টিএমএমকে (TMMK) —য়ে আজিৰে পৰা অনিৰ্দিষ্টকালীন অসম-অৰুণাচল সংযোগী পথ অৱৰোধৰ ঘোষণা দিছে। সংগঠনসমূহে দায়ী লোকৰ গ্ৰেপ্তাৰ আৰু দ্ৰুত ন্যায় বিচাৰৰ দাবী জনাইছে।

স্থানীয় ৰাইজ আৰু বিভিন্ন সামাজিক সংগঠনে অৰুণাচলত অসমীয়া লোকৰ সুৰক্ষাৰ বাবে দ্ৰুত পদক্ষেপ লোৱাৰ বাবে চৰকাৰৰ দৃষ্টি আকৰ্ষণ কৰিছে।