আম আদমী পাৰ্টীয়ে দিল্লীত পৰাজিত হোৱাৰ পিছতে সমগ্ৰ দেশৰ নেতাসকলে দল ত্যাগ কৰাৰ লগতে অসমত নেতাসকলে দল ত্যাগ কৰিবলৈ আৰম্ভ কৰিছে৷ আজি অসমৰ ৰাজ্যিক সমিতিৰ সভাপতি আৰু ৰাজ্যিক মহিলা সমিতিৰ সভাপতিয়ে দলত্যাগৰ ঘোষণা কৰিছে৷ ৰাজ্যিক সমিতিৰ সভাপতি মনোজ ধানোৱাৰ আৰু ৰাজ্যিক মহিলা সমিতিৰ সভানেত্ৰী মাছুমা বেগমে আজি দল ত্যাগ কৰাৰ আনুষ্ঠানিক ঘোষণা কৰে৷ ৰাষ্ট্ৰীয় সমিতিলৈ আনুষ্ঠানিক পদত্যাগ পত্ৰ প্ৰেৰণ কৰিছে দুয়োগৰাকী মুৰব্বীয়ে৷ কেৱল পদ এৰাই নহয় দলটোৰ প্ৰাথমিক সদ্য পদো ত্যাগ কৰিছে নেতাদ্বয়ে৷ আজি পুৱাই সামাজিক মাধ্যম যোগে দলত্যাগৰ ঘোষণা কৰিছে ৰাজ্যিক সভাপতি মনোজ ধানোৱাৰে৷ পদত্যাগ পত্ৰও সামাজিক মাধ্যমত শ্বেয়াৰ কৰে৷ তাৰ পিছতে আপৰ অসম ৰাজ্যিকৰ সভানেত্ৰী মাছুমা বেগমে দলত্যাগ কৰে। আপ অসমৰ ভাৰপ্ৰাপ্ত সভাপতি ড০ ভৱেন চৌধুৰীক পদত্যাগ পত্ৰ প্ৰেৰণ কৰে মাছুমাই৷ ২০২৪ চনৰ ছেপ্তেম্বৰ মাহৰ পৰাই নিষ্ক্ৰিয় হৈ আছিল মনোজ ধানোৱাৰ৷ জানুৱাৰী মাহত জৰুৰী বৈঠক অনুষ্ঠিত কৰি প্ৰাক্তন ৰাজ্যিক সভাপতি ডা০ ভবেন চৌধুৰীক ভাৰপ্ৰাপ্ত সভাপতিৰ দায়িত্ব প্ৰদান কৰে। আজিলৈ এজন বিধায়ক জয়ী কৰিবলৈ সক্ষম হোৱাটো দূৰৰ কথা আজিলৈ যিমান কেইজন প্ৰাৰ্থীয়ে বিধানসভা নিৰ্বাচনত অৱতীৰ্ণ হৈছে সকলোৰে আমানতৰ ধন বাজেয়াপ্ত হৈছে যদিও খোৱা-কামোৰা, আভ্যন্তৰীণ কন্দলত জৰ্জৰিত আম আদমী পাৰ্টীৰ অসম ৰাজ্যিক সমিতি৷ ডা০ ভবেন চৌধুৰী আৰু মনোজ ধানোৱাৰৰ লবীকেন্দ্ৰীক ৰাজনীতিৰ বাবে পুৰণি নেতাসকল দলটোৰ পৰা আতৰি যায়৷