পঞ্চায়ত নিৰ্বাচনৰ প্ৰচাৰ চলাই আজি মুখ্যমন্ত্ৰী ড° হিমন্ত বিশ্ব শৰ্মাই উত্তৰ আৰু মধ্য অসমত চলায়। তেওঁ শোণিতপুৰ জিলাৰ বিশ্বনাথ আৰু নগাঁও জিলাৰ বিভিন্ন অঞ্চলত বিজেপি-আগপ মিত্ৰজোঁটৰ সমৰ্থনত সভাত ভাষণ আগবঢ়ায়।

হাজাৰ হাজাৰ লোকৰ উপস্থিতিত মুখ্যমন্ত্ৰীয়ে দাবী কৰে যে, এইবাৰ পদুম ফুলিবই। বিশ্বনাথত আয়োজিত সভাত মুখ্যমন্ত্ৰীয়ে কয়, “ৰাষ্ট্ৰীয় গণতান্ত্ৰিক মৰ্চাৰ লক্ষ্য হ’ল অসমৰ প্ৰতিটো অঞ্চলৰ বিকাশ আৰু ৰাজ্যখনক দেশৰ ভিতৰত শ্ৰেষ্ঠ ৰাজ্যৰ ৰূপত গঢ়ি তোলা।” তেওঁ লগতে ঘোষণা কৰে যে অক্টোবৰৰ পৰা ৰেচন কাৰ্ডৰ জৰিয়তে বিনামূলীয়া চাউলৰ লগতে দাইল, চেনী আৰু নিমখ বজাৰৰ তুলনাত যথাক্ৰমে ২০, ৩০ আৰু ১০ টকা কম দৰত বিতৰণ কৰা হ’ব।

মুখ্যমন্ত্ৰীগৰাকীয়ে শিক্ষাৰ ক্ষেত্ৰত নতুন সুবিধাৰ কথাও ঘোষণা কৰে—এইবাৰৰ পৰা কোনো চক্ৰ বিষয়াৰ প্ৰমাণ পত্ৰৰ প্ৰয়োজন নোহোৱাকৈ কেৱল ৰেচন কাৰ্ড থাকিলেই মহাবিদ্যালয়ত নামভৰ্তি বিনামূলীয়া হ’ব।

কংগ্ৰেছৰ ওপৰত তীব্ৰ আক্রমণ চলাই মুখ্যমন্ত্ৰীয়ে কয়, “কংগ্ৰেছৰ দিনত কেৱল টকাৰ বিনিময়তেই নহয়, চৰকাৰী চাকৰিৰ নামত ছোৱালীৰ সতীত্বও হৰণ কৰা হৈছিল। বিপ্লৱ শৰ্মাৰ তদন্ত প্ৰতিবেদনত এই সন্দৰ্ভত সাক্ষ্যো দিয়া হৈছে।” তেওঁ অভিযোগ তোলে যে কংগ্ৰেছে ৰাজহুৱা সম্পদৰ অপব্যৱহাৰ কৰি নিজৰ অট্টালিকা নিৰ্মাণ কৰিছে, কিন্তু সাধাৰণ ৰাইজৰ বাবে একো কৰা নাই।

বৰচলাত অনুষ্ঠিত আন এখন সভাত মুখ্যমন্ত্ৰীয়ে কয়, “পহলগামত হোৱা নাৰকীয় ঘটনা পাকিস্তানী সন্ত্ৰাসবাদীয়ে সংঘটিত কৰিছিল। আৰু সেই পাকিস্তানতে কংগ্ৰেছৰ এগৰাকী সাংসদ ১৫ দিন ধৰি থাকি আহে। তেওঁৰ পত্নীয়ে ভাৰতত চাকৰি কৰি দৰমহা লয় পাকিস্তানৰ পৰা। তেওঁ নিজৰ সন্তানকো ভাৰতৰ নাগৰিক স্বীকৃতি দিব নোখোজে।”

এই সকলো বক্তব্যৰ জৰিয়তে মুখ্যমন্ত্ৰীয়ে বিজেপিৰ শাসনকালৰ ‘স্বচ্ছতা’ আৰু ‘উন্নয়ন’ক তুলনা কৰে কংগ্ৰেছৰ ‘ভ্ৰষ্টাচাৰ’ আৰু ‘নৈতিক অধপতনৰ’ সৈতে।