অসম আৰক্ষীয়ে বিতৰ্কিত শুকুৰ আলিক গ্ৰেপ্তাৰ কৰিছে৷ আজি গোৱালপাৰা আৰক্ষীয়ে শুকুৰ আলিক গ্ৰেপ্তাৰ কৰিছে। ভাইৰেল ভিডিঅ’ৰ আলমত ৰুজু গোচৰৰ ভিত্তিত শুকুৰ আলীক গ্ৰেপ্তাৰ কৰা হয়৷ ধৰ্মীয় ভাবাবেগ লৈ উচটনি দি বিভেদ সৃষ্টিৰ চেষ্টা আৰু ইতিহাস বিকৃতি কৰাৰ দৰে গুৰুতৰ অভিযোগৰ ভিত্তিত গ্ৰেপ্তাৰ কৰা হৈছে৷ গোৱালপাৰা আৰক্ষীয়ে গ্ৰেপ্তাৰ কৰি তদন্ত আৰম্ভ কৰিছে৷ চামগুৰিত নিৰ্বাচনী সভাত কামাখ্যা মন্দিৰ আৰু আহোম সম্প্ৰদায়ৰ বিৰুদ্ধে বিতর্কিত আৰু ইতিহাসবিৰোধী মন্তব্য কৰাত ৰাজ্যজুৰি প্ৰচণ্ড ক্ষোভৰ সৃষ্টি হৈছিল। শুকুৰ আলিয়ে দাবী কৰিছিল যে মোগল সম্ৰাট ঔৰংজেবে ৰাম মন্দিৰ আৰু কামাখ্যা মন্দিৰ উভয়ৰ বাবে ভূমি দান কৰিছিল। ইতিহাসবিদসকলে এই দাবী সম্পূৰ্ণ মিথ্যা আৰু উদ্দেশ্যপ্ৰণোদিত বুলি আখ্যা দিয়ে। শুকুৰ আলিয়ে ইয়াৰে উপৰিও কয় যে আহোমসকলে অসমৰ বাবে কিবা কৰাই নাই বুলি কৈছিল৷ ফলত কেইবাটাও সংগঠনে উজনি অসমৰ কেইবাখনো আৰক্ষ্ষী থানা, গুৱাহাটীত এজাহাৰ দাখিল কৰা হয়। বজৰং দল, মছলিম পৰিষদকে ধৰি বহু সংগঠনে শুকুৰ আলিৰ গ্ৰেপ্তাৰৰ দাবী জনাইছিল। শুকুৰ আলিৰ এই মন্তব্যে সামাজিক মাধ্যমত ব্যাপক প্ৰতিক্ৰিয়া সৃষ্টি কৰে। ইতিহাসবিদ, বুদ্ধিজীৱী, আৰু সাধাৰণ ৰাইজে কামাখ্যা মন্দিৰ আৰু আহোম ৰজাসকলৰ ঐতিহাসিক অৱদানক লৈ হোৱা এই ধৰণৰ বিকৃতিৰ তীব্ৰ ভাষাৰে নিন্দা কৰে।