মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত আজি অনুষ্ঠিত অসম কেবিনেটৰ বৈঠকত ৰাজ্যিক কৰ্মচাৰী-পেঞ্চনাৰসকলৰ ডি এ ২% বৃদ্ধি, বান পৰিস্থিতি পৰিচালনাৰ বাবে যুৱ বাহিনী গঠন, মহিলাসকলৰ বাবে হোষ্টেল নিৰ্মাণকে ধৰি একাধিক গুৰুত্বপূৰ্ণ সিদ্ধান্ত গ্ৰহণ কৰা হৈছে। লগতে সংসদত কংগ্ৰেছ এমপি গৌৰৱ গগৈৰ বিতৰ্কিত মন্তব্যৰ প্ৰতি প্ৰতিক্ৰিয়া জনাই মুখ্যমন্ত্ৰীয়ে দেশবাসীৰ ওচৰত ক্ষমা যাচিছে।

ডি এ বৃদ্ধি: ২০২৫ চনৰ ১ জানুৱাৰীৰ পৰা ৰাজ্যিক কৰ্মচাৰী আৰু পেঞ্চনাৰসকলৰ মৰগীয়া ভাতা (ডি এ) ৫৩%ৰ পৰা ৫৫%লৈ বৃদ্ধি কৰা হৈছে। ইয়াৰ জৰিয়তে ৭ লাখ ৩৮ হাজাৰতকৈও অধিক লোকে লাভান্বিত হ’ব। অসমেই দেশত প্ৰথমখন ৰাজ্য হিচাপে ৫৫% ডি এ প্ৰদানৰ সিদ্ধান্ত লৈছে। মুখ্যমন্ত্ৰীয়ে এই বৃদ্ধিক “বিহুৰ উপহাৰ” আখ্যা দিয়ে অসমৰ অৰ্থনীতি আৰু প্ৰগতিত কৰ্মচাৰীসকলৰ অৱদানক সন্মান জনাইছে।

বান পৰিচালনা: বান প্ৰতিৰোধৰ বাবে ‘মথাউৰি সমিতি’ গঠন কৰা হ’ব। বাৰিষাত নদীৰ বান্ধ (মথাউৰি) নিৰীক্ষণৰ দায়িত্ব ১০-১৫ সদস্যৰ যুৱ দলসমূহে ল’ব। গাঁও ৰক্ষী বাহিনীৰ দৰে এই স্বেচ্ছাসেৱকসকলে অক্টোবৰলৈকে বান পৰিস্থিতিৰ ওপৰত চকু ৰাখিব আৰু পিছত তেওঁলোকক কৃতজ্ঞতা পত্ৰ প্ৰদান কৰা হ’ব।

মহিলা হোষ্টেল আৰু ভাষা নীতি: জাগীৰোডত ১৪২ কোটি টকাৰ বিনিয়োগত ছেমিকণ্ডাক্টৰ খণ্ডৰ মহিলা কৰ্মচাৰীসকলৰ বাবে হোষ্টেল নিৰ্মাণ কৰিব। ইয়াৰোপৰি, ১ ব’হাগৰ পৰা চৰকাৰী কাৰ্য্যালয়সমূহত অসমীয়া ভাষাৰ বাধ্যতামূলক প্ৰয়োগ কৰা হ’ব। চৰকাৰী জাননী আৰু আদেশসমূহ ইংৰাজীৰ লগতে অসমীয়াত প্ৰকাশ কৰাটো বাধ্যতামূলক হ’ব।

অন্যান্য সিদ্ধান্ত: ৫০০ চাহ বাগিচাত মহাপ্ৰভু জগন্নাথ কমিউনিটি হল স্থাপন আৰু চৰকাৰী হাস্পতালৰ বাবে ১৯০ কোটি টকাৰ ঔষধ ক্ৰয়ৰ অনুমোদন দিয়া হৈছে।

গৌৰৱ গগৈৰ বিৰুদ্ধে ক্ষমা যাচনা: সংসদত ৱাকফ বিলৰ বিৰোধিতা কৰোঁতে কংগ্ৰেছ এমপি গৌৰৱ গগৈয়ে “মুছলমানসকলক ৰাস্তাত নামাজ পঢ়িবলৈ বাধা দিয়া” আৰু “স্বাধীনতা সংগ্ৰামত মুছলমানৰ অগ্ৰণী ভূমিকা”ৰ কথা কৈছিল। এই মন্তব্যৰ প্ৰতি প্ৰতিক্ৰিয়া জনাই মুখ্যমন্ত্ৰী শৰ্মাই কৈছে, “অসমৰ মুছলিমসকলে সুন্দৰ মছজিদত নামাজ পঢ়ে। স্বাধীনতা সংগ্ৰাম মহাত্মা গান্ধী, গোপীনাথ বৰদলৈ আদিৰ নেতৃত্বত হৈছিল। গৌৰৱ গগৈৰ মন্তব্যে অসমক লজ্জিত কৰিছে। দেশবাসীৰ ওচৰত ক্ষমা বিচাৰিছোঁ।” তেখেতে উল্লেখ কৰে যে গগৈৰ বক্তব্যৰ ফলত ৰাজ্যৰ ভাবমূৰ্তি ক্ষুণ্ণ হোৱাটো বেদনাদায়ক।