ডিজিটেল ডেস্কঃ উত্তৰ প্ৰদেশৰ গ্ৰেটাৰ নয়ডাত এগৰাকী কেব চালকক আক্ৰমণ কৰি ৭ হাজাৰ টকা লুটি নিয়াৰ গোচৰত গোচৰ ৰুজু কৰা হৈছে আৰক্ষীৰ এগৰাকী উপ-পৰিদৰ্শক আৰু তেওঁৰ সহযোগীৰ বিৰুদ্ধে। অভিযুক্ত আৰক্ষী বিষয়াজনক চাকৰিৰ পৰা বৰ্খাস্ত কৰাৰ বিপৰীতে থানাৰ ভাৰপ্ৰাপ্ত বিষয়া, আউটপোষ্ট ইনচাৰ্জ আৰু এজন পৰিদৰ্শকক নিলম্বন কৰা হৈছে। আৰক্ষী আয়ুক্তগৰাকীয়ে ডিচিপি চেণ্ট্ৰেল জ’ন সুনীতিক পদৰ পৰা অপসাৰণ কৰি তেওঁৰ ঠাইত শক্তি মোহন অৱস্থীক ডিচিপি চেণ্ট্ৰেল নয়ডা হিচাপে নিযুক্তি দিযে।

দৰাচলতে যোৱা ৭ আগষ্টত বিছৰাখ থানা এলেকাত ৰেল উপ পৰিদৰ্শক অমিত মিশ্ৰ আৰু তেওঁৰ দুই সহযোগী অভিনৱ আৰু আশীষে এজন কেব চালকক প্ৰহাৰ কৰি ৭ হাজাৰ টকা কাঢ়ি লৈ ​​গৈছিল। এই ঘটনাৰ লগত জড়িত বাহন দুখন স্ক’ৰপিঅ’ আৰু এখন হুণ্ডাই ভেনিউ আৰক্ষীয়ে জব্দ কৰিছে। উপ পৰিদৰ্শক অমিত মিশ্ৰ আৰু তেওঁৰ সহযোগীসকলৰ বিৰুদ্ধে গোচৰ ৰুজু হোৱাৰ লগতে অমিতক গ্ৰেপ্তাৰ কৰা হৈছে। তেওঁৰ দুই সহযোগী অভিনৱ আৰু আশীষক গ্ৰেপ্তাৰ কৰিবলৈ প্ৰেৰণ কৰা হৈছে আৰক্ষীৰ দল।

নয়ডা আৰক্ষী আয়ুক্ত লক্ষ্মী সিঙে কয় যে ঘটনাৰ বিষয়ে অৱগত হোৱাৰ পাছতো দুদিন ধৰি ব্যৱস্থা গ্ৰহণ নকৰাৰ বাবে আৰু উচচপদস্থ বিষয়াৰ পৰা ঘটনাটো লুকুৱাই ৰখাৰ বাবে ডিচিপি চেণ্ট্ৰেল নয়ডা সুনীতিক পদৰ পৰা অপসাৰণ কৰা হয় আৰু শক্তি মোহন অৱস্তিক তেওঁৰ ঠাইত ডিচিপি চেণ্ট্ৰেল নয়দা হিচাপে নিযুক্তি দিয়া হয় । এই বিষয়ত গাফিলতিৰ বাবে বিছাৰখ থানাৰ ভাৰপ্ৰাপ্ত পৰিদৰ্শক অৰবিন্দ কুমাৰ, গৌৰ চহৰৰ আউটপোষ্ট ভাৰপ্ৰাপ্ত ৰমেশ চন্দ্ৰ আৰু উপ-পৰিদৰ্শক মোহিতক নিলম্বন কৰা হৈছে। তেওঁ কয় যে প্ৰশিক্ষাৰ্থী উপ পৰিদৰ্শক অমিত মিশ্ৰক উপ পৰিদৰ্শক অধীনস্থ শ্ৰেণীৰ আৰক্ষী বিষয়াৰ শাস্তি আৰু আপীল নিয়ম ১৯৯১ৰ নিয়ম ৮ (২) খৰ অধীনত সেৱাৰ পৰা বৰ্খাস্ত কৰা হৈছে।