গুৱাহাটীঃ ধিং কাণ্ডৰ পিছতে যেন মিঞা আৰু সন্দেহযুক্ত নাগৰিকৰ বিৰুদ্ধে ক্ষোভৰ উদগীৰণ ঘটিছে উজনি অসমত। বীৰ লাচিত সেনা, জাতীয় যুৱ মঞ্চকে ধৰি বিভিন্ন খিলঞ্জীয়া দল-সংগঠনে উজনি অসমত বিভিন্ন কামত নিয়োজিত মিঞা আৰু সন্দেহযুক্ত নাগৰিকক শীঘ্ৰে উজনি অসম পৰিত্যাগ কৰিবলৈ সকিয়নী দিছে। মিঞাক উজনি অসম এৰিবলৈ ৭ দিনৰ সময়ো বান্ধি দিছে দল-সংগঠনসমূহে।

ইফালে মিঞা হাতাও এই অভিযানৰ মাজতে শেহতীয়াকৈ ছ’চিয়েল মিডিয়াত ভাইৰেল হৈ পৰে নাজিৰাৰ এটা ভিডিঅ’। য’ত একাংশ সন্দেহযুক্ত মিঞাক কাণত ধৰি আঁঠু কাঢ়িবলৈ দিয়া লগতে একাংশ অসমীয়াই ‘জয় আই অসম’ ক’বলৈ বাধ্য কৰোৱা পৰিলক্ষিত হয়।

উজনি অসমত মিঞাৰ বিৰুদ্ধে খিলঞ্জীয়া অসমীয়াই গ্ৰহণ কৰা এনে পদক্ষেপৰ মাজতে অসমৰ ৰাজ্যপালক সাক্ষাৎ কৰে এ আই ইউ ডি এফৰ বিধায়ক তথা নেতাৰ এটা সজাতি দলে।

ৰাজ্যপালক সাক্ষাৎ কৰাৰ পিছত এ আই ইউ ডি এফে কয় যে উজনি অসমত মিঞাৰ বিৰুদ্ধে আৰম্ভ হোৱা অত্যাচাৰ প্ৰতিৰোধ কৰিবলৈ তেওঁলোকে ৰাজ্যপালক সাক্ষাৎ কৰি এক স্মাৰক পত্ৰ প্ৰদান কৰে।

দলটোৰ বিধায়ক আমিনুল ইছলামে কয়, ”উজনি অসমত যিদৰে মিঞাৰ ওপৰত আক্ৰমণ আৰম্ভ হৈছে, আঁঠু কাঢ়িবলৈ বাধ্য কৰোৱা হৈছে, এনেবোৰ ঘটনাই অসমত অশান্তিকৰ পৰিস্থিতিৰ সৃষ্টি কৰিব পাৰে। সেয়ে মিঞাৰ ওপৰত হোৱা এনে ঘটনাক লৈ আমি উদ্বিগ্নতা প্ৰকাশ কৰি ৰাজ্যপালক সাক্ষাৎ কৰি মিঞাৰ সুৰক্ষা বিচাৰিছো।’’

প্ৰণিধানযোগ্য যে, শেহতীয়াকৈ ধিঙত এগৰাকী কিশোৰী ছাত্ৰীৰ ধৰ্ষণকাণ্ডৰ সৈতে এটা বিশেষ সম্প্ৰদায় জড়িত থকাৰ তথ্য পোহৰলৈ অহাৰ পিছতে মিঞা আৰু আন সন্দেহযুক্ত নাগৰিকৰ বিৰুদ্ধে সৰৱ হৈ পৰিছে বীৰ লাচিত সেনাকে ধৰি বিভিন্ন খিলঞ্জীয়া দল-সংগঠন।