গুৱাহাটী মহানগৰীৰ মাজমজিয়াৰ গণেশগুৰি-খানাপাৰা সংযোগী পথত নিতৌ পথচাৰীয়ে যমৰ-যাতনা ভূগিবলীয়া হৈছে৷ অসম সচিবালয়, প্ৰশাসনিক কলেজ, পশু চিকিৎসা মহাবিদ্যালয়, চাহ নিলাম কেন্দ্ৰ, ব্যক্তিগত-চৰকাৰী বহু কাৰ্যালয়ৰ বিষয়া-কৰ্মচাৰীৰ আহ-যাহত ব্যৱহাৰ কৰা সদাব্যস্ত গণেশগুৰি-খানাপাৰা সংযোগী পথত যান-জঁট পৰিব লগা হৈছে পথচাৰী৷ পথত যান-জঁট লগাৰ কাৰণ হৈছে ছয়মাইলৰ উৰণীয়া সেঁতু৷ চাৰিমাহে বাঁহৰ বেৰিকেট লগাই ৰখা হৈছে সেঁতুখন৷ দীৰ্ঘদিনে সেঁতুখনত আহ-যাহ বন্ধ হৈ আছে৷ এটা খুঁটাত ফাট মেলাত প্ৰশাসন তথা লোক নিৰ্মাণ বিভাগে সেঁতুখনত যাতায়ত বন্ধ কৰি ৰাখিছে৷ যাৰ ফলত পথটোত চলাচল কৰা সকলো বাহৰে উৰণীয়া সেঁতুখনৰ তলেৰে সৰু পথেৰে আহ-যাহ কৰিবলগীয়া হোৱা দুয়োটো দিশে খানাপাৰা আৰু গণেশগুৰি দিশত প্ৰায়ে যান-জঁট লগা পৰিলক্ষিত হয়৷ যাক লৈ তীব্ৰ প্ৰতিক্ৰিয়াৰ সৃষ্টি হৈছে৷ ২০০৪ চনত নিৰ্মাণ আৰম্ভ কৰা আৰু ২০০৯ চনত মুকলি কৰা সেঁতুখন মাথো ১৭ বছৰৰ পিছতে অকমিলা হৈ পৰাত প্ৰতিক্ৰিয়াৰ সৃষ্টি হৈছে৷ তদানীন্তন তৰুণ গগৈ চৰকাৰৰ দিনত নিৰ্মাণ কৰা সেঁতুখন নিৰ্মাণত ঠিকাদাৰ আৰু গড়কাপ্তীনি বিভাগে দুৰ্নীতিৰ আশ্ৰয় লৈছিল নেকি তাকে লৈ আৰম্ভ হৈছে চৰ্চা৷ নিৰ্মাণৰ ১৬ বছৰ পিছতেই সেঁতুখনৰ চাৰি নং খুঁটাটোত বৃহৎ ফাঁট মেলে৷ উৰণীয়া সেঁতুখনৰ পুনৰ নিৰ্মাণৰ দায়িত্ব প্ৰদান কৰা হৈছিল গৌতম কনষ্ট্ৰাকচনক। লোকনিৰ্মাণ বিভাগে বিশেষজ্ঞৰ দ্বাৰা পৰীক্ষা কৰি পুনৰ নিৰ্মাণ কৰিবলৈ প্ৰয়াস কৰিছিল৷ আগশাৰীৰ ৰে’লৱেৰ অভিযন্তা, ৰাজস্থান, কলকাতাৰ বিশেষজ্ঞৰ দলে সেঁতুখন পৰীক্ষা কৰিছে। বিশেষজ্ঞই মেৰামতি কৰিব নোৱাৰিব বুলি মত দিয়া বুলি জানিব পৰা গৈছে৷ যদি তেনেকৈয়ে সেঁতুখন ব্যৱহাৰ কৰা তেন্তে ভয়ংকৰ দুৰ্ঘটনা সংঘটিত হোৱাৰ আশংকা কৰা হৈছে৷ ২৪ বছৰ পূৰ্বে নিৰ্মাণত জড়িত ঠিকাদাৰী প্ৰতিষ্ঠান ছিমপ্লেক্স আৰু লোকনিৰ্মাণ বিভাগৰ একাংশ বিষয়াৰ বিৰুদ্ধে গুৰুতৰ অভিযোগ উত্থাপন হ’ব ধৰিছে৷ যদি সঁচাকৈয়ে মেৰামতি কৰিব নাযায় তেন্তে সেঁতুখন ভাঙি পেলাবলগীয়া হ’ব পাৰে৷ যদি ভাঙি পেলাবলগীয়া হয় তেন্তে ৰাজ্যৰ ৰাজকোষৰ কেইবা কোটি টকা পানীত পৰিব৷ অৱসৰৰ পাছতো লোকনিৰ্মাণ বিভাগৰ বিশেষ দায়িত্বত থকা অভিযন্তা দীব্যজ্যোতি চহৰীয়া জড়িত উৰণীয়া সেঁতুখন নিৰ্মাণৰ সময়ত লোকনিৰ্মাণ বিভাগত চাকৰি কৰি আছিল৷ সেঁতুখনত নিৰ্মাণত হোৱা দুৰ্নীতিত এইগৰাকী অভিযন্তাৰ নামত উচ্চাৰণ হ’ব ধৰিছে৷ সেঁতুখনৰ জৰিয়তে মহানগৰবাসীৰ যাতায়ত সহজ হৈ পৰিছিল যদিও এতিয়া তীব্ৰ যানজঁটৰ মাধ্যম হৈ পৰিছে। নিম্নমানৰ সামগ্ৰী, অভিযন্তাৰ দুৰ্নীতি আদিৰ বাবে আজি ৰাইডে যমৰ-যাতনা ভূগিবলীয়া হৈছে৷