গীৰ গাই কেলেংকাৰীৰ জোঁৱালত নাম সোমাই যোৱা কমলপুৰৰ বিধায়ক তথা দাদা ব্ৰিগেডৰ সদ্য সদস্য দিগন্ত কলিতাই আজি সংবাদ মাধ্যমৰ সন্মুখত ৰঙিয়া ৰে’ল ষ্টেচনৰ পৰা গাই নিয়াৰ কথা স্বীকাৰ কৰি পশ্চাতাপ প্ৰকাশ কৰিছে।

কংগ্ৰেছৰ পৰা অহা দিগন্ত কলিতাৰ লগতে মুখ্যমন্ত্ৰী হিমন্ত বিশ্ব শৰ্মাৰ ঘনিষ্ঠ জয়ন্তমল্ল বৰুৱা, ভূৱন পেগু আদিয়ে ‘গৰুখুঁটি প্ৰকল্প’ৰ বাবে অনা গীৰ গাই আত্মসাৎ কৰাৰ অভিযোগত নাম সাঙোৰ খাইছে।

নিবিদা নকৰাকৈ পানীৰ দৰত গাই বিক্ৰী কৰাৰ অভিযোগ পোহৰলৈ আহোঁতে, চৰকাৰী বৃত্ত আৰু ৰাজনৈতিক মহলত তীব্ৰ প্ৰতিক্ৰিয়া দেখা দিয়ে। এই কেলেংকাৰীক কেন্দ্ৰ কৰি “গৰু চোৰ” বুলি সম্বোধন কৰা আৰম্ভ হৈছে দিগন্ত কলিতাক, যি এতিয়া ৰাজনৈতিক বাতাবৰণত অন্যতম বিতৰ্কিত বিষয় হিচাপে শিৰোনাম দখল কৰিছে।

আজিৰ সংবাদ মাধ্যমৰ সন্মুখত দিগন্ত কলিতাই কয়ঃ

“ময়ো দুটা গীৰ গাই ২০২২ চনত কিনিছিলো। ৯০ হাজাৰ টকাত এটা গাই লৈছিলো। মোৰ ঘৰ কমলপুৰত, পিতৃৰ ঘৰৰ পৰা লোৱা হৈছিল। গাখীৰ উত্পাদন নোহোৱাৰ বাবে আৰু টেনকিনেকল ডিফেক্ট আছিল বুলি গাই দুটা ঘুৰাই দিছিলো। কিন্তু এইটোৱেই এতিয়া ইমান বিতৰ্কত পৰিছে, নাম ধৰা হৈছে ‘গৰু চোৰ’ বুলি। মই সমগ্ৰ কথা ৰাজহুৱা কৰিলো কিয়নো বিষয়টো এতিয়া সৰ্বসাধাৰণৰ মাজত আহি পৰিছে।”

নিবিদা অবিহনে গাই বিক্ৰী কৰা সন্দৰ্ভত দিগন্ত কলিতাৰ মন্তব্য আছিলঃ

“এই বিষয়ে মই একো নাজানো। যদি কিবা খেলিমেলি হৈছে, তেন্তে গৰুখুঁটি প্ৰকল্পৰ অধ্যক্ষ পদ্ম হাজৰিকাই উত্তৰ দিব লাগিব।”

উল্লেখযোগ্য যে, গৰুখুঁটি প্ৰকল্পৰ অধীনত অনা প্ৰায় ৯০টা গীৰ গাই কিছুমান বাছি লোৱাৰ অভিযোগত বহুজনৰ নাম পোহৰলৈ আহিছে। অকল বিধায়ক নহয়, ব্যৱসায়ীসকলো গাই লোৱাৰ বিষয়টো দিগন্ত কলিতাই উল্লেখ কৰিছে।