ডিজিটেল ডেস্কঃ একেৰাহে হৈ থকা বৰষুণৰ পিছতে গুজৰাটৰ বিভীষিকাৰ সৃষ্টি কৰিছে বান পৰিস্থিতিয়ে। ৰাজ্য চৰকাৰখনে প্ৰকাশ কৰা তথ্য অনুসৰি, এই বান প্ৰলয়ত এতিয়ালৈকে ২৯ জন লোকৰ মৃত্যু ঘটাৰ লগতে প্ৰভাৱিত হৈছে কেইবা সহস্ৰাধিক লোক।

আনহাতে বতৰ বিভাগে বৃহস্পতিবাৰৰ দিনটোতো ১১ জিলাত ধাৰাসাৰ বৰষুণৰ পূৰ্বাভাস জাৰি কৰাৰ পিছত বান পৰিস্থিতি অধিক জটিল হৈ পৰাৰ আশংকা কৰা হৈছে। ৰাজ্যখনৰ কেইবাখনো জিলাৰ ১৮ হাজাৰৰো অধিক লোকে ইতিমধ্যে নিজৰ ঘৰ-বাৰী এৰি আশ্ৰয় শিৱিৰত আশ্ৰয় গ্ৰহণ কৰিবলগীয়া হৈছে।

বতৰ বিজ্ঞান বিভাগৰ তথ্য অনুসৰি সৌৰাষ্ট্ৰ আৰু কুচ অঞ্চলত নিম্ন চাপৰ বাবে গুজৰাটত অব্যাহত আছে ধাৰাসাৰ বৰষুণ। বৃহস্পতিবাৰে গুজৰাটৰ ১১খন জিলাত প্ৰবল বৰষুণৰ পূৰ্বাভাস প্ৰকাশ কৰিছে আই এম ডিয়ে। তাত জাৰি কৰা হৈছে ‘ৰেড এলাৰ্ট’। লগতে ২২খন জিলাত ‘ইয়েল’ এলাৰ্ট’ জাৰি কৰা হৈছে।

মৰ্বি, বদোদৰা, ভৰুচ, জামনগৰ, আৰাৱল্লী, পঞ্চমহল, দ্বাৰকা আৰু ডাং জিলাত কমেও ১ জন লোকৰ মৃত্যু হোৱা বুলি গুজৰাট চৰকাৰে জানিবলৈ দিয়ে। লগতে আনন্দত ৬ জন, আহমেদাবাদত ৪ জন, গান্ধীনগৰ, খেদা, মহিসাগৰ, দহোদ আৰু সুৰেন্দ্ৰনগৰত ২ জনকৈ লোকৰ মৃত্যু হয় বানৰ ফলত। বিশ্বমিত্ৰীৰ পৰা আৰম্ভ কৰি আন কেইবাখনো নদী বিপদসীমাৰ ওপৰেৰে বৈ আছে। বৃহস্পতিবাৰেও দ্বাৰকা, মৰ্বি, সুৰেন্দ্ৰনগৰ, জুনাগড়, ৰাজকোটত ধাৰাসাৰ বৰষুণ হ’ব পাৰে।

ইতিমধ্যে প্ৰধানমন্ত্ৰী নৰেন্দ্ৰ মোদীয়ে গুজৰাটৰ মুখ্যমন্ত্ৰী ভূপেন্দ্ৰ পেটেলক ফোন কৰি পৰিস্থিতিৰ বুজ লৈছে। গুজৰাটৰ মুখ্যমন্ত্ৰীক কেন্দ্ৰৰ পৰা প্ৰয়োজনীয় সকলো সহায়ৰ আশ্বাস দিয়া হৈছে।