গুৱাহাটী মহানগৰীত বিভিন্ন লোকক প্ৰৱঞ্চনা কৰা ভণ্ড বাবাক দিছপুৰ আৰক্ষীয়ে গ্ৰেপ্তাৰ কৰিবলৈ সক্ষম হৈছে৷ গণেশগুৰিৰ আনন্দ প্লাজাৰ পৰা ভণ্ড তান্ত্ৰিকক গ্ৰেপ্তাৰ কৰিবলৈ সক্ষম হয়৷ এজন তান্ত্ৰিকৰ নেতৃত্বত চক্রটোৱে বহু লোকক প্ৰৱঞ্চনা কৰাৰ অভিযোগৰ ভিত্তিত আৰক্ষীয়ে অভিযান চলাইছিল বুলি জানিব পৰা গৈছে। গ্ৰেপ্তাৰ কৰা লোকজন বাবা মস্তান খান নামৰে পৰিচিত, যাৰ প্ৰকৃত নাম মহছিন খান। তেওঁক প্রতাৰণা আৰু ধোঁকা-ধাপণৰ বহু অভিযোগৰ ভিত্তিত আটক কৰা হয়। আনন্দ প্লাজাত ভুৱা চেম্বাৰ খুলি নিজকে ধৰ্মীয় গুৰু আৰু মানসিক ৰোগৰ চিকিৎসক বুলি পৰিচয় দিছিল। তেওঁ প্ৰেম বিয়া, বিদেশ ভ্ৰমণ আৰু বিভিন্ন ৰোগ-ব্যাধিৰ সমাধান দিম বুলি কৈ নানা ধৰণৰ ৰীত-নীত আৰু মন্ত্র-পাঠৰ নামত ধন আত্মসাৎ কৰিছিল। আৰক্ষী সূত্ৰে জনোৱা মতে, বাবা মস্তান খানে বিশেষকৈ ৰোগত ভোগি থকা অসহায় ৰোগীক লক্ষ্য কৰি প্ৰতাৰণা কৰিছিল। অভিযান চলোৱাৰ সময়ত আৰক্ষীয়ে তেওঁৰ পৰা ধৰ্মীয় সামগ্ৰী, ভুৱা নথিপত্ৰ আৰু সন্দেহজনক সামগ্ৰী উদ্ধাৰ কৰে।