আইৰ মুখৰ ভাষাটোক ভাষাটোক প্ৰাণৱন্ত কৰি ৰাখিবলৈ হ’লে ভাষাটোৰ চৰ্চা হ’ব লাগিব৷ বাছ যাত্ৰা, ৰে’ল যাত্ৰা, পাচলিৰ বজাৰ, চৰকাৰী কাৰ্যালয়ত ভাষাটো ব্যৱহাৰ হ’ব লাগিব৷ পাঠ্যক্ৰমত অসমীয়া বাধ্যতামূলক কৰাৰ লগতে ঘৰুৱা পৰিৱেশত ভাষাৰ ব্যৱহাৰ মজবুত হ’ব লাগিব৷ নিজ ভাষাৰ কবিতা, গল্প, সাহিত্যৰ সৃষ্টিত গুৰুত্ব দিব লাগিব৷ তেনেই এক মহৎ উদ্দেশ্যে লৈ গুৱাহাটীত গঠন হৈছে অসম ভাষা সুৰক্ষা সমিতি৷ ৰাজধানী গুৱাহাটীৰ বুকুৰ পৰা আৰম্ভ কৰা হৈছে ভাষা সুৰক্ষাৰ যাত্ৰা৷ গুৱাহাটী প্ৰেছ ক্লাৱত অনুষ্ঠিত বিশেষ সভাত অসম ভাষা সুৰক্ষা সমিতি গঠন কৰা হয়৷ বিশিষ্ট কবি নীলিম কুমাৰক সভাপতি, সন্দীপ ছমৰীয়াক সাধাৰণ সচিবৰ দায়িত্ব প্ৰদান কৰা হয়৷ অসমীয়া ভাষা সুৰক্ষা সমিতি গঠন কৰাৰ লগতে ‘মোৰ ভাষা, মোৰ জননী’ গীত উন্মোচন কৰা হয়৷