ৰাজ্যৰ শিক্ষাখণ্ডলৈ নতুন বার্তা কঢ়িয়াই আজি গুৱাহাটী বিশ্ববিদ্যালয়ত অনুষ্ঠিত হৈ যায় দ্বাত্রিংশতম দীক্ষান্ত সমাৰোহ। গুৱাহাটী বিশ্ববিদ্যালয়ৰ অন্তৰ্গত ৩০০ খনতকৈও অধিক মহাবিদ্যালয়ৰ সৰ্বমুঠ ৩৭৪৩ গৰাকী শিক্ষার্থীক এই অনুষ্ঠানৰ জৰিয়তে আনুষ্ঠানিকভাৱে সন্মানীয় ডিগ্রী প্ৰদান কৰা হয়। লগতে সৰ্বমুঠ ১৪৮ গৰাকী ব্যক্তিলৈ পি এইচ ডি ডিগ্রী আগবঢ়োৱা হয়। দীক্ষান্ত সমাৰোহৰ সভাপতিত্ব কৰে অসমৰ ৰাজ্যপাল তথা বিশ্ববিদ্যালয়ৰ সন্মানীয় আচার্য লক্ষ্মণ প্রসাদ আচার্য্যই। সন্মানীয় অতিথি হিচাপে উপষ্ঠিত থাকে মুখ্যমন্ত্রী ড০ হিমন্ত বিশ্ব শৰ্মা। শিক্ষামন্ত্রী ডা০ ৰণোজ পেগুৱে নিজৰ ভাষণত তেখেতে ভাৰতৰ প্ৰাচুৰ্য্যময় ইতিহাস আৰু অসমৰ সোণোৱালী সভ্যতাক উপস্থাপন কৰি ৰাজ্য চৰকাৰে কিদৰে অসমৰ পূৰ্বৰ গৌৰৱ গৰিমা ঘূৰাই আনিবৰ বাবে অহর্নিশে কাম কৰিছে। অসমৰ শিক্ষাখণ্ডৰ প্ৰগতিৰ ক্ষেত্ৰত ৰাজ্য চৰকাৰে কিদৰে অহোপুৰুষাৰ্থ কৰিছে সেয়াও উল্লেখ কৰে। এখন শান্তিময়, সমৃদ্ধিশালী, প্ৰগতিৰ অসমৰ বাবে তেখেতৰ সপোনৰ বিষয়ে কৈ তেখেতে এইবুলি মতপোষণ কৰে যে এখন বিকশিত ভাৰতৰ এখন বিকশিত অসমক গঢ় দিবলৈ আৰু অর্থনৈতিক-সাংস্কৃতিক- শৈক্ষিক-বৌদ্ধিক আদি সকলো স্তৰৰ উন্নয়নৰ বাবে ৰাজ্য চৰকাৰ দৃঢ়প্রতিজ্ঞ। বৌদ্ধিক- নৈতিক- সামাজিক ক্ষেত্রসমূহত আগভাগ লবলৈ বিশ্ববিদ্যালয়ৰ ছাত্রসমাজক আহ্বান জনায়। ভাষণৰ শেষত মুখ্যমন্ত্রী শৰ্মাই গুৱাহাটী বিশ্ববিদ্যালয়লৈ আগন্তুক পাঁচবছৰৰ বাবে ২৫০ কৌটি টকাৰ অনুদান আগবঢ়ায়। ৰাইজক সম্বোধন কৰি অসমৰ ৰাজ্যপাল তথা বিশ্ববিদ্যালয়ৰ আচাৰ্য লক্ষ্মণ প্রসাদ আচার্য্যই মহাপুৰুষ শ্ৰীমন্ত শংকৰদেৱে জ্ঞানী আৰু বিদ্বানসকলৰ বিষয়ে কোৱা শ্লোকৰ উদ্ধৃতি দি কয় যে শিক্ষাৰ জৰিয়তে মানুহে জীৱনৰ দুই মূল উদ্দেশ্য- জ্ঞান বিস্তাৰ আৰু চৰিত্ৰ নিৰ্মাণ সার্থক কৰিব পাৰে। ৰাজ্যৰ বৌদ্ধিক উন্নয়নৰ ক্ষেত্ৰত গুৱাহাটী বিশ্ববিদ্যালয়ৰ প্রশংসা কৰি তেখেতে এই কথা উল্লেখ কৰে যে গুৱাহাটী বিশ্ববিদ্যালয়ে হৈছে নতুন শিক্ষানীতি ২০২০ প্ৰযোজ্য কৰা উত্তৰ পূৱৰ প্ৰথমখন বিশ্ববিদ্যালয়। তদুপৰি ই-সমৰ্থৰ দৰে ডিজিটেল মাধ্যমক আকোঁৱালি বিশ্ববিদ্যালয়ে নিজৰ প্ৰযুক্তিগত সক্ষমতাকেই প্রমাণ কৰিছে। দীক্ষান্ত সমাৰোহৰ কাৰ্যসূচীত বি বৰুৱা কৰ্কট প্ৰতিস্থানৰ প্ৰাক্তন সঞ্চালক ড০ অমল চন্দ্র কাকতীলৈ বিজ্ঞানৰ সন্মানীয় ডক্টৰেট ডিগ্ৰী আগবঢ়ায়। ইয়াৰ লগতে টাই-খাস্টি ভাষা-সংস্কৃতিৰ বিশেষজ্ঞ তথা অৰুণাচল প্ৰদেশৰ উপমুখ্যমন্ত্রী চাওনা মেইনলৈ সন্মানীয় পি এইচ ডি ডিগ্রী আগবঢ়োৱা হয়। ইয়াৰোপৰি জেলক চিকিৎসালয় আৰু গৱেষণা কেন্দ্ৰৰ সঞ্চালক ড০ তপন কুমাৰ শইকীয়ালৈ সন্মানীয় পি এইচ ডি ডিগ্রী আগবঢ়োৱা হয়।