অনলাইন ট্ৰেডিং কাণ্ডৰ নায়িকা চুমি বৰাৰ বৌৱেক জিংকি মিলিক জামিন লাভত সহায় কৰিছিল চৰকাৰী অধিবক্তাই৷ এই অভিযোগ উত্থাপনৰ পাছতে তীব্ৰ প্ৰতিক্ৰিয়াৰ সৃষ্টি হয়৷ আজি মুখ্যমন্ত্ৰী হিমন্ত বিশ্ব শৰ্মাই বিষয়টোক লৈ হস্তক্ষেপ কৰে আৰু অধিবক্তাৰ বিৰুদ্ধে একচন ল’বলৈ বাধ্য হয়৷ অনলাইন ট্ৰেডিং কাণ্ডৰ সৈতে জড়িত থকাৰ অভিযুক্ত চুমি বৰাৰ পৰিয়ালকো তদন্তৰ আওতাত লোৱা হৈছিল৷ চুমি বৰাৰ বৌৱেক জিংকি মিলিকো অভিযুক্ত কৰিছিল অসম আৰক্ষীয়ে৷ কিন্তু অধিবক্তাৰ সহায় কৰাৰ ফলত চুমি বৰাৰ বৌৱেক জিংকি মিলিয়ে অন্তৱৰ্তীকালীন জামিন লাভ কৰে৷ চুমিৰ বৌৱেক জিংকি মিলিক অন্তৱৰ্তীকালীন জামিন দিছিল গুৱাহাটী উচ্চ ন্যায়ালয়ৰ ন্যায়াধীশ মালেশ্বৰী নন্দীৰ আদালতে। ২৫ হাজাৰ টকা বণ্ডৰ বিনিময়ত আদালতে জামিন মঞ্জুৰ কৰিছিল৷ তাৰ পাছতে চৰকাৰী অধিবক্তাৰ অৱহেলাৰ বাবে আদালতে জামিন দিয়াৰ অভিযোগ উঠিছে৷ অধিবক্তাই নিৰ্লিপ্ত ভূমিকা পালন কৰাত জিংকি মিলিয়ে জামিন লাভ কৰা তথ্য পোহৰলৈ অহাত তীব্ৰ প্ৰতিক্ৰিয়াৰ সৃষ্টি হৈছে। আদালতত চৰকাৰী পক্ষৰ অধিবক্তা বিদ্যুৎ‍ বিকাশ গগৈক ইতিমধ্যে পদৰ পৰা অব্যাহতি দিয়া হৈছে। অধিবক্তা গগৈৰ লগতে, চৰকাৰী অধিবক্তা কাৰ্যালয়ৰ সহায়ক ব্রজেন কুমাৰ দাস, অৰূপ কুমাৰ ডেকাকে ধৰি তিনিজনক চাকৰিৰ পৰা নিলম্বিত কৰা হৈছে। জানিব পৰা মতে, মোকৰ্দমাকাৰী মাখন ফুকনৰ পৰা লুকুৱাই ৰাখিছিল জামিনৰ গোচৰৰ নথি-পত্ৰ। যাৰ ফলত মাখন ফুকন আদালতত উপস্থিত থাকিব পৰা নাছিল আৰু চৰ্তসাপেক্ষে অন্তৱৰ্তীকালীন অগ্ৰিম জামিন লাভ কৰিছিল জিংকিয়ে। জিংকি মিলি বিৰুদ্ধে ৩৫২/২০২৪ত গোচৰ ৰুজু হৈছিল৷ জেৰাৰ বাবে তলব কৰিছিল পলাতক হৈ আছিল মিলি। অন্তৱৰ্তীকালীন জামিন লাভত তীব্ৰ প্ৰতিক্ৰিয়াৰ সৃষ্টি হোৱাত মুখ্যমন্ত্ৰী ড০ হিমন্ত বিশ্ব শৰ্মাৰ নিৰ্দেশত তদন্ত কৰি অধিবক্তা বিদ্যুৎ‍ বিকাশ গগৈক পদৰ পৰা অব্যাহতি দিয়ে মহাধিবক্তাই। জিংকি মিলিৰ স্বামী তথা চুমিৰ ভাতৃ ৰাজীৱ বৰা বৰ্তমানেও পলাতক৷