২০২৬ চনৰ নিৰ্বাচনত পুনৰ একেকেইটা বিষয়ক লৈ বিজেপি দলে নিৰ্বাচনত নামিবলৈ সাজু হৈছে৷ সেই কথা স্পষ্ট৷ সেইটো হৈছে মিঞা, জেহাদী, হিন্দু-মুছলমান৷ মুখ্যমন্ত্ৰীৰ মুখত বাৰে বাৰে জেহাদী, মিঞা, তেওঁলোক মানে মুছলমান আৰু হিন্দুৰ সুৰক্ষা আদিৰ কথা শুনা গৈছে৷ কালিৰে পৰা আকৌ মুখ্যমন্ত্ৰীৰ মুখত শুনা গৈছে জেহাদীৰ কথা৷ হোজাইত সন্দেহজনক লোকক নিয়াই জিম্মাত লোৱাৰ পাছৰে পৰা মুখ্যমন্ত্ৰীয়ে কঁচুতলীৰ উচ্ছেদৰ সৈতে ধৰ্ম বিশেষক সংযোগ কৰি মন্তব্য প্ৰদান কৰিবলৈ আৰম্ভ কৰিছে৷ তাৰ মাজতে এদিন পূৰ্বে গোৱালপাৰাৰ কেইবাটাও এলেকাত অভিযান চলাই নিয়া আৰু অসম আৰক্ষীৰ এছটিএফে সন্দেহজনক ৯ জন লোকক আটক কৰিছিল৷ নিয়াই ৯ জনক আটক কৰাৰ পাছতে মুখ্যমন্ত্ৰীৰ মন্তব্যৰ পাৰা দুগুন গতিত বৃদ্ধি পায়৷ মুখ্যমন্ত্ৰীয়ে এই বিষয়টোক লৈ পোনেপোনে ৰাজনীতি কৰাৰ সময়তে গোৱালপাৰাৰ ৯জনকৈ লোকক নিয়াই ঘৰলৈ যাবলৈ দিয়া বুলি জানিব পৰা গৈছে৷ হোজাই আৰু গোৱালপাৰাত নিয়া আৰু অসম আৰক্ষীৰ এছটিএফে ১০জন লোকক আটক কৰা বুলি জানিব পৰা গৈছিল৷ শনিবাৰে আটক কৰি নিয়াই মাৰাথন জেৰাৰ অন্তত ৯ জন লোকক মুকলি কৰি দিয়ে৷ ইয়াৰে এজন মাথো লোকক নিয়াই দিল্লীলৈ নিয়া বুলি জানিব পৰা গৈছে৷ শ্বেখ চুলতান আলাউদ্দিন আয়ুবিক গোৱালপাৰা আদালতত হাজিৰ কৰাই জিম্মাত লয় নিয়াই। প্ৰকাশিত খবৰ মতে, শ্বেখ চুলতান আলাউদ্দিন আয়ুবিয়ে বেংকৰ চিএছপি চলাই৷ সেই চিএছপিৰ পৰা আটকাধীন লোককেইজনে ধন উলিয়াইছিল৷ সেই সন্দেহতে লোককেইজনক সোধ-পোছ কৰি পাছত মুকলি কৰি দিয়া হয়৷ নিষিদ্ধ জৈছ-ই-মহম্মদ নামৰ ইছলামিক সংগঠনৰ সৈতে শ্বেখ চুলতান আলাউদ্দিন আয়ুবি যোগাযোগ থকাৰ সন্দেহ কৰা হৈছে৷ মৌলবাদী শ্বেখ চুলতান আলাউদ্দিন আয়ুবিৰ মাদ্ৰাছা লিংক পোহৰলৈ আহিছে বুলি খবৰ প্ৰকাশ পাইছে৷ গোৱালপাৰাৰ জামিয়া আশ্ৰাফুল উলুম নামৰ মাদ্ৰাছাৰ অধ্যক্ষ পদতো থকা শ্বেখ চুলতান আলাউদ্দিন আয়ুবিৰ বেংক একাউণ্টত বুজন পৰিমাণৰ ধনৰ লেন-দেনৰ তথ্য ওলাইছে৷ এই তথ্য পৰীক্ষা কৰাৰ অন্তত জৈছ-ঈ-মহম্মদে যোগান ধৰিব পাৰে বুলিও সন্দেহ কৰা হৈছে৷ আলাউদ্দিন আয়ুবিয়ে ক’ৰ পৰা কেনেকৈ ধন লাভ কৰিলে সেই তথ্য এই পৰ্যন্ত অসম আৰক্ষী বা নিয়াই ৰাজহুৱা কৰা নাই৷ উল্লেখ্য যে, হোজাই জিলাৰ ডবকাৰ পৰা প্ৰথমে গ্ৰেপ্তাৰ কৰা হৈছিল ৰহমত আলীক৷ ৰহমত আলীৰ স্বীকাৰোক্তিৰ ভিত্তিত গোৱালপাৰা জিলাত অভিযান চলাইছিল৷ লগতে দেশজুৰি নিয়াই ইছলামিক মৌলবাদীৰ বিৰুদ্ধে অভিযান চলাইছিল৷ এই অভিযানত সমগ্ৰ দেশজুৰি যেনে দিল্লী, উত্তৰ প্ৰদেশ, মহাৰাষ্ট্ৰ, জম্মু-কাশ্মীৰত অভিযান চলাই সফলতা লাভ কৰে৷ এই অভিযানত ৫ জন লোকক গ্ৰেপ্তাৰ কৰিবলৈ সক্ষম হৈছিল৷ ইয়াৰ ভিতৰত আছিল আলাউদ্দিন আয়ুবি৷ তাৰ পাছতে নিয়াৰ দল অসমত উপস্থিত হৈ হোজাই আৰু গোৱালপাৰাত অভিযান চলায়৷ এই অভিযানত অসমত জৈছ-ঈ-মহম্মদৰ তৎপৰতাৰ তথ্য লাভ কৰে৷ ডবকাৰ নাহৰগাঁৱৰ ৰহমত আলীক গ্ৰেপ্তাৰৰ পাছতে এই পৰ্দা ফাছ হয়৷ ৰহমত আলীৰ ঘৰ গোৱালপাৰাৰ টুকুৰাত৷