গুৱাহাটীত মুখ্যমন্ত্ৰী ড০ হিমন্ত বিশ্ব শৰ্মাক সাক্ষাৎ কৰি বিজেপিত যোগদান কৰা অবনী কুমাৰ গগৈয়ে আছুক গাড্ডাৰী কৰাৰ অভিযোগ উত্থাপন হৈছে। সদৌ ডিব্ৰুগড় জিলা আছুৰ নামত থকা ফেচবুক পেজত পোষ্ট দি আছুৱে গুৰুতৰ অভিযোগ উত্থাপন কৰিছে। কেইবালক্ষ টকা লুণ্ঠন কৰাৰ অভিযোগ আনিছে সদৌ ডিব্ৰুগড় জিলা আছুৱে। গোচৰ তৰাৰ কথাও উল্লেখ কৰিছে পোষ্টটোত। ডিজিটেল লাইব্ৰেৰী আৰু কাৰ্যালয় নিৰ্মাণৰ নামত এই কেলেংকাৰী সংঘটিত কৰা বুলি কয় আছুৱে।

পোষ্টত সদৌ ডিব্ৰুগড় জিলা আছুৱে কয়
”বি.চি.পি.এলে ডিব্ৰুগড় জিলাৰ উপায়ুক্ত মহোদয়ৰ যোগেদি সদৌ ডিব্ৰুগড় জিলা ছাত্ৰ সন্থাই স্থাপন কৰি থকা ডিজিটেল লাইব্ৰেৰীৰ বাবে ১০ লাখ টকাৰ পুঁজি আগবঢ়াইছিল। সেই পুঁজিৰ দায়িত্বত আছিল অবনী কুমাৰ গগৈ। উক্ত পুঁজিৰ কেলেংকাৰীৰ লগত জড়িত অবনী কুমাৰ গগৈ। কাইলৈ ইয়াৰ বিৰুদ্ধে সদৌ ডিব্ৰুগড় জিলা ছাত্ৰ সন্থাই এজাহাৰ দাখিল কৰিব। লগতে নামৰূপ আঞ্চলিক ছাত্ৰ সন্থাৰ পুৰণি কাৰ্যালয়টো ভাঙি নতুনকৈ নিৰ্মাণ কৰিম বুলি অবনী কুমাৰ গগৈয়ে ইতিমধ্যে বহু ঠাইত কাৰ্যালয় নিৰ্মাণৰ নামত বহুপৰিমাণৰ ধন সংগ্ৰহ কৰিছে। এই দুয়োটা কেলেংকাৰীৰ বিৰুদ্ধে ছাত্ৰ সন্থাৰ তদন্তৰ ভয়ত তাৎক্ষণিকভাৱে আছু ত্যাগ কৰি বিজেপিত যোগদান কৰে।”