ডিজিটেল ডেস্কঃ ত্ৰিপুৰাত বিগত ৪৮ ঘণ্টাধৰি দি থকা ধাৰাসাৰ বৰষুণৰ ফলত উদ্ভৱ হোৱা পৰিস্থিতিত এতিয়ালৈকে ৭ জন লোকৰ মৃত্যু ঘটাৰ বিপৰীতে দুজন লোক সন্ধানহীন হৈ আছে। মঙলবাৰে এই তথ্য সদৰী কৰিছে ৰাজ্য চৰকাৰে। ত্ৰিপুৰা চৰকাৰে সদৰী কৰা মতে, ধাৰাসাৰ বৰষুণৰ পিছত সৃষ্টি হোৱা বান পৰিস্থিতিৰ বাবে ৫৬০৭ জন লোকে আশ্ৰয় শিৱিৰত আশ্ৰয় ল’বলগীয়া হৈছে।

বৰ্তমানৰ পৰিস্থিতি সন্দৰ্ভত এখন সংবাদমেল সম্বোধন কৰি ৰাজহ বিভাগৰ সচিব ব্রিজেশ পাণ্ডেয়ে মঙলবাৰে কয় যে বিগত ৪৮ ঘন্টাত অবিৰত বৰষুণৰ বাবে ত্ৰিপুৰাৰ নদীসমূহৰ জলস্তৰ বৃদ্ধি পাইছে আৰু ৰাজ্যখনৰ বিভিন্ন প্ৰান্তত বান পৰিস্থিতিৰ সৃষ্টি হৈছে।

তেওঁ কয় যে যোৱা ২৪ ঘন্টাত বাগাফা (৩৭৫.৮ মিলিমিটাৰ) আৰু বেলোনিয়া(৩২৪.৪ মিলিমিটাৰ) দক্ষিণ ত্ৰিপুৰা জিলা আৰু গোমটিৰ অমৰপুৰ (৩০৭.১ মিলিমিটাৰ)ত যথেষ্ট উচ্চ মাত্ৰাৰ বৰষুণ হৈছে। যাৰ ফলত হাওৰা, ধলাই, মুহুৰি আৰু খোৱাই নদীৰ পানী বিপদসীমাৰ ওপৰেৰে বৈ গৈছে।

তেওঁ কয় যে মুখ্যমন্ত্ৰী ড০ মাণিক সাহাই নতুন দিল্লীৰ পৰা নিয়মীয়াকৈ বান পৰিস্থিতিৰ বুজ লোৱাৰ লগতে আজি সন্ধিয়া নতুন দিল্লীৰ পৰা উভতি অহাৰ সময়ত বান পৰিস্থিতিৰ ওপৰত পুনৰীক্ষণ বৈঠক অনুষ্ঠিত কৰিব।

ব্ৰিজেশ পাণ্ডেয়ে বান পৰিস্থিতি সন্দৰ্ভত কয়, ‘ৰাজ্যৰ ৫৬০৭টা ক্ষতিগ্ৰস্ত পৰিয়ালক আশ্ৰয় প্ৰদানৰ বাবে জিলা প্ৰশাসনে মুঠ ১৮৩টা সাহায্য শিবিৰ মুকলি কৰিছে। ইয়াৰে ২৪টা সাহায্য শিবিৰ পশ্চিম ত্ৰিপুৰা জিলাত, ৬৮টা সাহায্য শিবিৰ গোমাটি জিলাত, ৩০টা সাহায্য শিবিৰ দক্ষিণ ত্ৰিপুৰা জিলাত আৰু ৩৯টা সাহায্য শিবিৰ খোৱাই জিলাত মুকলি কৰা হৈছে। বাকী চাৰিখন জিলাত ৰেষ্ট কেম্প আছে।”

তেওঁ লগতে কয় যে জিলা আৰু মহকুমা প্ৰশাসনে এই সাহায্য শিবিৰসমূহত খাদ্য, খোৱাপানী, চিকিৎসা ইত্যাদিকে ধৰি প্ৰয়োজনীয় সা-সুবিধা প্ৰদান কৰি আছে।

জিলা পৰ্যায়ৰ নিজ নিজ ডি এম আৰু ৰাজ্যিক পৰ্যায়ৰ সচিব(আৰ আৰ এণ্ড ডি এম) আৰু মুখ্য সচিবে পৰিস্থিতিৰ ওপৰত তীক্ষ্ণ দৃষ্টি ৰাখিছে।