আজি চাবুৱা-লাহোৱাল সমষ্টিত প্ৰায় দুই শতাধিক বিভিন্ন দলৰ নেতা-কৰ্মীয়ে অসম গণ পৰিষদত যোগদান কৰিছে৷ অগপৰ দখলত থকা চাবুৱা-লাহোৱাল সমষ্টিৰ বিধায়ক পোনাকণ বৰুৱাই পঞ্চায়ত নিৰ্বাচনক লৈ ব্যাপক তৎপৰ হোৱাৰ সময়তে আজি পুনৰ দুই শতাধিক লোকক দলটোত যোগদান কৰিছে৷ দিছপুৰ এৰি তৃণমূল পৰ্যায়ত দলৰ ভেটি মজবুত কৰিবলৈ দিনে-নিশাই সমষ্টিত সময়কটোৱা পোনাকণ বৰুৱাৰ উপস্থিতিত আজি যোগদান সভা অনুষ্ঠিত হয়৷ ডিকমত অনুষ্ঠিত যোগদান সভাত বিভিন্ন দলৰ দুই শতাধিক নেতা-কৰ্মীয়ে অসম গণ পৰিষদত যোগদান কৰিছে। ডিকম টাউনৰ ৰাজহুৱা প্ৰেক্ষাগৃহত অনুষ্ঠিত যোগদান কাৰ্যসূচীত বিজেপি-কংগ্ৰেছ দলৰ লগতে অন্যান্য দলৰ নেতা-কৰ্মীয়ে দলটোত যোগদান কৰিছে৷ বিধায়ক পোনাকণ বৰুৱা আৰু অগপৰ স্থানীয় নেতাসকলে দলটোত যোগদান কৰা নেতা-কৰ্মীসকলক একোখনকৈ ফুলাম গামোচা পিন্ধাই দলটোলৈ আদৰণি জনাইছে৷ বিধায়ক বৰুৱাই আজিৰ যোগদানে অগপৰ গণভিত্তি যে আছিল আৰু আছে সেই কথা প্ৰতিপন্ন কৰা বুলি কয়৷ দিন গৈ থাকে মানে অসমত অগপ দলৰ গণভিত্তি বাঢ়ি গৈ থাকিব বুলি দাবী কৰিছে বিধায়ক বৰুৱাই৷ অগপৰ ডিকমৰ স্থানীয় যুৱনেতা ৰাতুল গগৈয়ে অগপ দলটোৱে ৰাইজৰ মৰম-চেনেহৰ মাজত জীয়াই থকা দল বুলি উল্লেখ কৰি কয় যে অগপই সদায়েই ঐক্যত বিশ্বাসী দল বুলি কয়৷ অগপই জাতি, বৰ্ণ, ধৰ্মৰ নামত ৰাজনীতি নকৰে৷ সকলোকে সমমৰ্যাদা প্ৰদান কৰাৰ নীতিৰে অগপ দলে চাৰিটা দশক ৰাজনীতি কৰিছে আৰু অনাগত দিনত সমাজক এক কৰিবলৈ ৰাজনীতি কৰিব যাব৷ বিশেষকৈ চাবুৱা-লাহোৱাল সমষ্টিৰ ডিকম পঞ্চায়ত অগপৰ দখললৈ আনিবলৈ আহ্বান জনাইছে ৰাতুল গগৈয়ে৷ যোগদান সভাত অগপ নেত্ৰী অঞ্জলী গগৈ, যুৱ সমাজকৰ্মী নিৰ্মল গগৈও উপস্থিত থাকে৷