Brahmaputra Times
ডিজিটেল ডেস্কঃ দেওবাৰে পুৱাই সংঘটিত এক ভয়ংকৰ পথ দুৰ্ঘটনাই প্ৰাণ কাঢ়ি লৈ গ’ল ১০ জনকৈ লোকৰ। পুৱা উত্তৰ প্ৰদেশৰ বুলন্দশ্বহৰত এখন বাছ আৰু এখন পিকআপৰ মাজত সংঘটিত হয় সংঘৰ্ষ। আৰক্ষীয়ে সদৰী কৰা মতে, এই দুৰ্ঘটনাটোত ১০ জন লোকৰ থিতাতে মৃত্যু ঘটাৰ বিপৰীতে আন ২৭ জন গুৰুতৰভাৱে আহত হয়। আহতসকলৰ ৪ জনৰ অৱস্থা অতি সংকটজনক বুলি জানিব পৰা গৈছে।
জানিব পৰা মতে, বুলন্দশ্বহৰৰ চেলেমপুৰ-বদৌন পথত এই দুৰ্ঘটনাটো সংঘটিত হোৱাৰ সময়ত গাজিয়াবাদৰ পৰা সম্ভল অভিমুখে পিকআপখন গৈ থকাৰ বিপৰীতে যাত্ৰীবাহী বাছখন গৈ আছিল বুলন্দশ্বহৰ অভিমুখে। অৱশ্যে দুৰ্ঘটনাটো কিদৰে সংঘটিত হ’ল সেয়া এতিয়াও স্পষ্ট হোৱা নাই।
দুৰ্ঘটনাৰ পিছতে স্থানীয় লোকে উদ্ধাৰ অভিযান আৰম্ভ কৰি আহত সকলক নিকটৱৰ্তী হাস্পতাললৈ প্ৰেৰণ কৰে। পিছত আৰক্ষীৰ দল ঘটনাস্থলীত উপস্থিত হৈ নিহত সকলৰ মৃতদেহ উদ্ধাৰ কৰে।
