পশ্চিমবংগৰ মহিলা চিকিৎসক ধৰ্ষণ আৰু হত্যাকাণ্ডই উত্তাল কৰি ৰাখিছে সমগ্ৰ দেশ৷ বিভিন্ন দল-সংগঠনৰ সহায়ত চিকিৎসক সংগঠনসমূহে প্ৰতিবাদ অব্যাহত ৰাখিছে৷ তাৰ মাজতে আজি চিকিৎসক সংগঠনে বিশেষ কাৰ্যসূচী ঘোষণা কৰিছে৷ যি কাৰ্যসূচীৰ ফলত দেশৰ কেইবা লক্ষ ৰোগী প্ৰভাৱিত হোৱাৰ আশংকা কৰা হৈছে৷

চিকিৎসকসকলৰ সংগঠন ইণ্ডিয়ান মেডিকেল এছোচিয়েচনে শনিবাৰে পুৱা ৬ বজাৰ পৰা দেওবাৰে পুৱা ৬ বজালৈ দেশজুৰি কৰ্মবিৰতি তথা ‘সেৱা প্ৰত্যাহাৰ’ কাৰ্যসূচী ঘোষণা কৰিছে৷ এই কাৰ্যসূচীৰ ৰূপায়নৰ সময়ত কেৱল আপাতকালীন সেৱাহে লাভ কৰিব৷ অন্য সকলো সেৱা প্ৰদানৰ পৰা বিৰত থাকিব দেশৰ চিকিৎসকসকল। নিয়মীয়া অ’পিডি (বাহিৰৰ ৰোগী বিভাগ) আৰু পূৰ্বে নিৰ্ধাৰিত অস্ত্ৰোপচাৰো নকৰাৰ সিদ্ধান্ত লয় ইণ্ডিয়ান মেডিকেল এছোচিয়েচনে। এই কাৰ্যসূচীক সমৰ্থন কৰিছে দেশৰ প্ৰায়সমূহ চৰকাৰী-বেচৰকাৰী হাস্পাতালত নিয়োজিত চিকিৎসকসকলে।

চিকিৎসকৰ ‘সেৱা প্ৰত্যাহাৰ’ এই কাৰ্যসূচী অসমতো ৰূপায়ন কৰা হৈছে। অসমত প্ৰায় কেইখন হাস্পতালত এই কাৰ্যসূচী ৰূপায়ন কৰাত ৰোগীসকল বিমোৰত পৰিছে৷

কলকাতাৰ আৰ জি কৰ মেডিকেল কলেজত সংঘটিত জঘণ্য কাণ্ডৰ পাছতে চিকিৎসকৰ নিৰাপত্তা বিচাৰি আজি পুৱা ৬ বজাৰ পৰা দেশজুৰি এই কাৰ্যসূচী ৰূপায়ন কৰিছে চিকিৎসকসকলে৷