নগাঁও জিলাৰ সদৰ চহৰৰ মাজেৰে বৈ যোৱা সোনাই নৈ আজি অস্তিত্বৰ সংকটত পৰিছে৷ কিয়নো নৈৰপাৰৰ বৃহৎ এলেকা একাংশ লোকে দখল কৰি ঘৰ-দুৱাৰ সাজি ব্যৱসায় কৰি থকাৰ অভিযোগ উত্থাপন হৈছে৷ জিলা উপায়ুক্তৰ কাৰ্যালয়ৰ সমীপৰে বৈ যোৱা সোনাই নৈ পুতি ঘৰ নিৰ্মাণ কৰা হৈছে৷ সোনাই নৈ পুতি ঘৰ নিৰ্মাণ কৰি মানুহে বসবাস কৰাই নহয় ব্যৱসায় কৰি গৈছে৷

সোনাই নৈ দখল কৰি ঘৰ-বৰ নিৰ্মাণ কৰি থকা প্ৰত্যক্ষ কৰি ৰাজহচক্ৰ বিষয়াক কেইবাবাৰো অৱগত কৰিছে স্থানীয় লোকে৷ কিছুদিন পূৰ্বে নৈৰ পাৰত দেৱাৰ নিৰ্মাণ কৰা থকা অৱস্থাত নিজেই আগভাগ লৈ নিৰ্মাণ বন্ধ কৰি দিছে ৰাইজে৷ কিন্তু কেইদিনমান পাছত পুনৰ একেই কাণ্ড সংঘটিত হয়৷ সমাজকৰ্মী, আছু, অসম জাতীয়তাবাদী যুৱ-ছাত্ৰ পৰিষদ আদিয়ে দেখা নাপায় কিয়?

সোনাই নৈৰ বুকু এতিয়া অবৈধ বসতিস্থল হৈ পৰিছে৷ যাৰ যেতিয়াই মন যায় তেতিয়াই দখল কৰে ঐতিহাসিক সোনাই নৈৰ পাৰ৷ বুলডজাৰ লগাই খনন কৰা হয় সোনাই নৈৰ পাৰ৷ নিৰ্মাণ কৰা হৈছে ঘৰ দুৱাৰ, স্কুল কলেজ৷ নিৰ্বিঘ্নে নিৰ্মাণ কৰিছে অট্টালিকা আৰু দোকান-পোহাৰ৷ নগাঁও জিলা উপায়ুক্তৰ কাৰ্যালয়ৰ সমীপৰ নগঞাৰ আবেগ সোনাই নৈ একাংশৰ ব্যক্তিগত সম্পত্তি হৈ পৰিছে৷ ৰাইজে অভিযোগ দিলে মণ্ডল, চক্ৰ বিষয়া আহি পৰিদৰ্শন কৰে আৰু গুছি যায়৷ তাৰ পাছত পুনৰ আৰম্ভ হয় বেদখল৷ ফলত ক্ৰমাৎ ঠেক হৈছে সোনাই নৈৰ চলচলি অংশ৷ এসময়ৰ পৱিত্ৰ পুজা থলী, গৰু বিহুত গৰুক ধুওৱা ঘাট৷ আজি মানুহৰ মল, মুত্ৰ, মানুহে পেলোৱা আৱৰ্জনাৰে ভৰি পৰিছে সোনাই নৈ৷ মহাপুৰুষ শ্ৰীমন্ত শংকৰদেৱৰ পৱিত্ৰ জন্মস্থান লৈ যোৱা তীৰ্থযাত্ৰীসকলে সোনাই নৈক পবিত্ৰ জ্ঞান কৰি আহিছে৷ তেনে এখন সোনাই নৈ আজি অস্তিত্বৰ সংকটত৷