গুৱাহাটীঃ বিজেপিৰ সৈতে একেলগে গাদী শ্বেয়াৰ কৰি ক্ষমতাত মচগুল অতুল বৰা, কেশৱ মহন্তৰ দৰে অসম গণ পৰিষদৰ শীৰ্ষ পৰ্যায়ৰ নেতা। আনফালে পুনৰ এবাৰ নাগৰিকত্ব সংশোধনী আইনক লৈ সৰৱ হৈ পৰিছে আঞ্চলিক দলটোৰ তৃণমূল পৰ্যায়ৰ নেতা-কৰ্মী।

ইতিমধ্যে দেশজুৰি বলবৎ হোৱা নাগৰিকত্ব সংশোধনী আইন অসমৰ বাবে ক্ষতিকাৰক বুলি মন্তব্য কৰিছে অগপৰ একাংশ নেতা-কৰ্মীয়ে। অন্য দেশৰ বাবে এই আইন লাভজনক হ’লেও অসমৰ বাবে ভয়াবহ বুলি অভিহিত কৰি উচ্চতম ন্যায়ালয়ৰ হস্তক্ষেপ বিচাৰিছে তেওঁলোকে।

বজালীত অনুষ্ঠিত আঞ্চলিক দলটোৰ এখন সভাত দলৰ কেন্দ্ৰীয় নেতা ধৰ্মেশ্বৰ ৰায়ে অসমৰ আঞ্চলিক স্বাৰ্থ ৰক্ষাৰ বাবে দলৰ দায়বদ্ধতা পুনৰ এবাৰ দোহাৰে। তেওঁ কয়, ‘আমি আঞ্চলিক দল হিচাপে বিভিন্ন সময়ত বিভিন্ন দলৰ সৈতে ৰাজনৈতিক বুজাবুজি গঢ়ি তুলিছো। কিন্তু আমাৰ অগ্ৰাধিকাৰ অসম আৰু ইয়াৰ জনসাধাৰণৰ মংগল সাধন কৰা।’ এনে পৰিপ্ৰেক্ষিততে নাগৰিকত্ব সংশোধনী আইনৰ অগপে বিৰোধিতা কৰে বুলিও মন্তব্য কৰে ৰায়ে।

সভাত বৰপেটা লোকসভাৰ প্ৰাক্তন সাংসদ কুমাৰ দীপক দাসো উপস্থিত থাকে। অসমৰ ভৱিষ্যৎ ৰাজনীতি গঢ় দিয়াত অগপৰ ভূমিকা গুৰুত্বপূৰ্ণ হৈয়েই আছে বুলি তেওঁ আস্থা প্ৰকাশ কৰে। দাসে কয়, ‘দেশৰ ৰাজনৈতিক পৰিৱৰ্তন স্পষ্ট, আৰু এই পৰিৱৰ্তনৰ দ্বাৰা অসম অস্পৃশ্য হৈ নাথাকিব।’

তেওঁ আঞ্চলিক ঐক্যৰ গুৰুত্ব আৰু এই পৰিৱর্তনৰ মাজতে অসমৰ অনন্য সাংস্কৃতিক আৰু জনগাঁথনিগত পৰিচয় যাতে সংৰক্ষিত হৈ থাকে তাৰ বাবে অগপৰ নিষ্ঠাৰ বিষয়েও কয়৷