পুনৰবাৰ পাকিস্তানে ভাৰতক আক্ৰমণৰ প্ৰয়াস কৰে৷ পাকিস্তানী ড্ৰোনে পঞ্জাবৰ ফিৰোজপুৰ জিলাত এটা পৰিয়ালৰ বাসগৃহত আক্ৰমণ কৰাত পৰিয়ালটোৰ তিনিগৰাকী লোক আহত হয়৷ ফিৰোজপুৰৰ এছ. এছ. পি. ভূপিন্দৰ সিং সিধুৱে সংবাদ সংস্থাক কয় যে ৩ জন লোক আহত হোৱাৰ তথ্য আহিছে। তেওঁলোকৰ শৰীৰত অগ্নিদগ্ধ হোৱা দেখা গৈছে। চিকিৎসকে তেওঁলোকক চিকিৎসা প্ৰদান কৰিছে। অধিকাংশ ড্ৰোন সেনাই নিস্ক্ৰিয় কৰি পেলাইছে। আজি দ্বিতীয়বাৰৰ বাবে পাকিস্তানৰ ড্ৰোন জম্মুত দেখা যায়৷ পুনছ, চাম্বা আৰু উৰিসহ বিভিন্ন ঠাইত পাকিস্তানৰ ফায়াৰিং পুনৰ আৰম্ভ হয়। চাম্বা আৰু পাঠানকোটত ড্ৰোন ধৰা পৰিছে। জম্মু-কাশ্মীৰৰ উধমপুৰ আৰু আখনুৰ, পাঞ্জাবৰ ফিৰোজপুৰ, হৰিয়ানাৰ আম্বালা আৰু পাঞ্চকুলা আৰু ৰাজস্থানৰ জয়ছেলমেৰত ব্ল্যাকআউট ঘোষণা কৰা হৈছে।পাকিস্তানে দ্বিতীয় দিনা আক্ৰমণ কৰিছে সীমান্তৱৰ্তী ভাৰতীয় এলেকাক৷ শুকুৰবাৰে সংবাদমাধ্যমত সেনাৰ কৰ্ণেল ছোফিয়া কুৰেশীয়ে কয় যে পাকিস্তানে ৮ আৰু ৯ মে’ তাৰিখৰ ভিতৰত ভাৰতৰ ৩৬টা স্থানত ৩০০–৪০০ ড্ৰোন ব্যৱহাৰ কৰি লক্ষ্য কৰিছিল৷ কিন্তু বিফল কৰা হৈছে৷ কালি নিশা ভাৰতীয় সশস্ত্ৰ বাহিনীয়ে পশ্চিম আৰু উত্তৰ সীমান্তত থকা সেনা ঘাটিসমূহত হোৱা পাকিস্তানৰ ড্ৰোন আৰু মিছাইল আক্ৰমণৰ প্ৰত্যুত্তৰত আক্ৰমণ চলায়। এই আক্ৰমণৰ মূল লক্ষ্য আছিল জম্মু, পাঠানকোট আৰু উধমপুৰ৷ যাৰ ফলত শ্রীনগৰ, চণ্ডীগড় আৰু ভুজসহ ১৫ৰো অধিক চহৰত বিদ্যুৎ বন্ধ কৰা হয়।