পাকিস্তানক সমৰ্থন কৰি ফেচবুক লাইভ কৰাৰ অভিযোগত অখিল গগৈৰ ঘনিষ্ঠ ছাত্ৰ মুক্তিৰ নেতাক গ্ৰেপ্তাৰৰ ঘটনাই তীব্ৰ চাঞ্চল্যৰ সৃষ্টি কৰিছে৷ ছাত্ৰ মুক্তি সংগ্ৰাম সমিতিৰ কেন্দ্ৰীয় সহকাৰী সম্পাদক অনিল বনিয়াক গ্ৰেপ্তাৰ কৰিছে বিহালী আৰক্ষীয়ে৷ অনিলৰ বিৰুদ্ধে পেহেলগামৰ বৰ্বৰ ঘটনা সন্দৰ্ভত পাকিস্তানক আওপকীয়াকৈ সমৰ্থন কৰাৰ অভিযোগ উত্থাপন হোৱাৰ দৃষ্টি গোচৰ হোৱাত আৰক্ষীয়ে ব্যৱস্থা গ্ৰহণ কৰিছে। ছ’চিয়েল মিডিয়াত পেহেলগামত পাকিস্থানী উগ্ৰপন্থী সংগঠনে সংঘটিত কৰা নাৰকীয় হত্যাযজ্ঞক লৈ বিতৰ্কিত মন্তব্য কৰিছিল৷ বিহালী আৰক্ষীয়ে ৪২/২৫ নম্বৰৰ গোচৰ ৰুজু কৰি ভাৰতীয় ন্যায় সংহিতাৰ ১৩৩ (৩)/১৫২/১৯৬/১৯৭ (১)/৩৫২/৩৫৩ ধাৰাত গ্ৰেপ্তাৰ কৰা হৈছে অনিল। বিহালী আৰক্ষীয়ে অনিল বনিয়াক গ্ৰেপ্তাৰ কৰি জেৰা অব্যাহত ৰখা বুলি জানিব পৰা হৈছে৷ ছাত্ৰ নেতা অনিলৰ বিৰুদ্ধে ৰাষ্ট্ৰদ্ৰোহৰ অপৰাধত গোচৰ ৰুজু কৰাৰ সম্ভাৱনা আছে বুলি জানিব পৰা গৈছে৷ ছাত্ৰ মুক্তি সংগ্ৰাম সমিতিৰ কেন্দ্ৰীয় সহকাৰী সম্পাদক হিচাপে কাৰ্যনিৰ্বাহ কৰি থকা অনিলক গ্ৰেপ্তাৰ সন্দৰ্ভত এই পৰ্যন্ত প্ৰতিক্ৰিয়া দিয়া নাই অখিল গগৈ বা সংগঠনৰ নেতৃত্বই।