ডিজিটেল ডেস্কঃ পাকিস্তানৰ বেলিচিস্তানত সোমবাৰে অস্ত্রধাৰী দুৰ্বৃত্তই কৰা গুলীবৰ্ষণত কমেও ২৩ জন লোক নিহত হোৱা বুলি জানিব পৰা গৈছে। দেশখনৰ সংবাদ মাধ্যমৰ বাতৰি অনুসৰি, বেলুচিস্তানৰ মুছাখেল জিলাত দুৰ্বৃত্তই বাছৰ পৰা যাত্ৰীসকলক নমাই তেওঁলোকৰ পৰিচয় সোধে আৰু তাৰ পিছতে ২৩ জন যাত্ৰীক গুলীয়াই হত্যা কৰে।

মুছাখেলৰ সহকাৰী আয়ুক্ত নাজিব কাকাৰৰ উদ্ধৃতি দি প্ৰকাশিত বাতৰি অনুসৰি মুছাখেলৰ ৰাৰছাম জিলাৰ আন্তঃপ্ৰদেশীয় ঘাইপথত প্ৰথমে অস্ত্ৰধাৰী লোকে অৱৰোধ কৰিছিল। ইয়াৰ পিছতে পাৰ হৈ যোৱা বাছবোৰ ৰখাই যাত্ৰীসকল নমাই আনে। জানিব পৰা মতে যাত্ৰীসকলৰ পৰিচয় পত্ৰ বিচৰাৰ পিছতে গুলীচালনা কৰে। নিহত আটাইকেইজন পঞ্জাৱ প্ৰদেশৰ বুলি জানিব পৰা গৈছে।

কাকাৰৰ উদ্ধৃতি দি কোৱা হৈছে যে অস্ত্ৰধাৰী লোকেও ১০খন বাহনত অগ্নিসংযোগ কৰে। ঘটনাস্থলীত উপস্থিত হৈ আৰক্ষীয়ে মৃতদেহকেইটা চিকিৎসালয়লৈ নিবলৈ আৰম্ভ কৰে। বেলুচিস্তানৰ মুখ্যমন্ত্ৰী ছাৰফৰাজ বুগটিয়ে এই সন্ত্ৰাসবাদী ঘটনাক তীব্ৰ গৰিহণা দিয়ে। তেওঁৰ কাৰ্যালয়ে প্ৰকাশ কৰা এক বিবৃতি অনুসৰি সন্ত্ৰাসবাদীৰ কাপুৰুষালিত নিহত হোৱা লোকসকলৰ পৰিয়াললৈ তেওঁ আন্তৰিক শোক আৰু সমবেদনা জ্ঞাপন কৰে।