অসমত বিজেপিৰ সদস্য ভৰ্তি ৫১ লাখতকৈ অধিক হোৱাৰ খবৰে চৰ্চা লাভ কৰাৰ সময়তে বিজেপি দলৰ সহযোগী অসম গণ পৰিষদ পিছ পৰি থকা নাই৷ অসম চৰকাৰৰ অংশীদাৰ ৰাজ্যৰ শক্তিশালী আঞ্চলিক দল অসম গণ পৰিষদৰ নেতাসকল দলটোক শক্তিশালী কৰিবলৈ তৎপৰ হৈ পৰিছে৷ গাঁৱে-ভূৱে অগপৰ নেতাসকল সোমাই পৰিছে৷ ২০২৬ চনৰ নিৰ্বাচনত আসন ভাগ-বাটোৱাৰাত গুৰুত্ব লাভৰ লক্ষ্য লৈ আঞ্চলিক দলটোৰ ভেটি শক্তিশালী কৰিবলৈ যোগদান কাৰ্যসূচী ত্বৰান্বিত কৰিছে৷ দলটোৰ উজনি অসমৰ বিধায়ক পোনাকণ বৰুৱাও পিছ পৰি থকা নাই৷ বিজেপিৰ প্ৰাক্তন ৱাৰ্ড সদস্যসহ তিনিখন গাঁৱৰ ৰাইজক অগপত যোগদান কৰাই শক্তি প্ৰদৰ্শন কৰিছে৷ অসম আন্দোলনৰ পটভূমিত প্ৰতিষ্ঠা লাভ কৰা আৰু অসমৰ জনগণৰ বিপুল সমৰ্থন লাভ কৰি দুবাৰকৈ চৰকাৰ গঠন কৰা অসম গণ পৰিষদ দলত চাবুৱা-লাহোৱাল বিধানসভা সমষ্টিৰ অন্তৰ্গত ডিকম গাঁও পঞ্চায়তৰ তিনিখন গাঁৱৰ লোকে যোগদান কৰে৷ ডিকম গাঁও পঞ্চায়তৰ নাদুৱা গ্ৰাণ্ট, ১নং হাতীগাধৈ, ২নং হাতীগাধৈ গাঁৱৰ ৰাইজে চাবুৱা সমষ্টিৰ বিধায়ক পোনাকণ বৰুৱাৰ উপস্থিতিত অগপত যোগদান কৰে। আজি হাতীগাধৈ ৰাজহুৱা প্ৰেক্ষাগৃহত অনুষ্ঠিত যোগদান সভাত চনিয়া গগৈৰ গীতেৰে সভাৰ শুভাৰম্ভ হয়। তাৰ পাছতে ৩খন গাঁৱৰ ৰাইজে অগপ দলত যোগদান কৰে। বিজেপি নাদুৱা গ্ৰাণ্ট গাঁৱৰ প্ৰাক্তন ৱাৰ্ড সদস্য তথা চাবুৱা মণ্ডলৰ উপ-সভাপতি ৰাতুল গগৈ, বিজেপি ১০৩নং হাতীগাধৈ বুথ সভাপতি ফটিক ঘৰফলীয়া, ১০১নং নাদুৱা জলকীয়া লাইন বুথ সভাপতি হৰিপ্ৰসাদ তাচা, ১০৩নং হাতীগাধৈ বুথ সম্পাদক জয়ন্ত শইকীয়া, নিৰ্মল গগৈ, বুলু গগৈ, মনোৰঞ্জন গগৈ, ৰুবুল কোঁৱৰ, বাবুলাল মূড়া, লোকাচ গগৈ, জিতু গগৈ, মনোজ গগৈ, মৃদুল গগৈ (জিতুল), দিপজ্যোতি গগৈ, গোপাল কৰ্মকাৰ, বাবুল গগৈ, দিব্যলতা শইকীয়া, ক্ষীৰোদ চেতিয়া, হিৰুজ গোঁহাই, বুল শইকীয়া, দিগন্ত শইকীয়া, সুমিত গগৈ, বিনোদ গগৈ, অমিয় গগৈ, মজিন গগৈ, বিজয় বৈঞ্চৱ, গোবিন্দ শইকীয়া, ৰুবুল গগৈ, অনুপ ঘৰফলীয়া, তুৰন ঘৰফলীয়া, মনোজ বাৰলাৰ লগতে গাঁওকেইখনৰ ৰাইজে অগপত যোগদান কৰে। যোগদান কাৰ্যসূচীত অগপৰ চাবুৱা-লাহোৱাল সমষ্টিৰ সভাপতি কৃষ্ণানন্দ দুৱৰা, সম্পাদক নিতুল কুমাৰ শইকীয়া, কাৰ্যকৰী সভাপতি নিপুল কোঁৱৰ, অগপ মহিলা পৰিষদৰ সভানেত্ৰী অঞ্জলী গগৈ, জ্যেষ্ঠ নেতা প্ৰভাত চাহু উপস্থিত থাকে।