Brahmaputra Times
ডিজিটেল ডেস্কঃ স্বাধীনতা দিৱস উপলক্ষ্যে দিল্লীৰ লালকিল্লাৰ প্ৰাচীৰৰ পৰা দিয়া ভাষণত প্ৰধানমন্ত্ৰী নৰেন্দ্ৰ মোদীয়ে স্বাধীনতাৰ পিছৰে পৰা এতিয়ালৈকে দেশত ‘সাম্প্ৰদায়িক নাগৰিক সংহিতা’ চলি আহিছিল বুলি কৰা মন্তব্যক লৈ তীব্ৰ প্ৰতিক্ৰিয়া ব্যক্ত কৰিছে কংগ্ৰেছে। প্ৰধানমন্ত্ৰীয়ে এনে মন্তব্য কৰি সংবিধানৰ প্ৰণেতা বাবাচাহেব আম্বেদকাৰক তীব্ৰ অপমান কৰা বুলি মন্তব্য কৰে বিৰোধী দলটোৱে।
কংগ্ৰেছৰ সাধাৰণ সম্পাদক জয়ৰাম ৰমেশে দাবী কৰে যে হিন্দু ব্যক্তিগত আইনৰ সংস্কাৰ, যাৰ আম্বেদকাৰ ডাঙৰ পোষক আছিল, তাৰ তীব্ৰ বিৰোধিতা কৰিছিল ৰাষ্ট্ৰীয় স্বয়ংসেৱক সংঘ আৰু ভাৰতীয় জনসংঘই।
জয়ৰাম ৰমেশে ছ’চিয়েল মিডিয়া প্লেটফৰ্ম ‘এক্স’ত পোষ্ট কৰি কয়, ‘নন-বায়’লজিকেল প্ৰধানমন্ত্ৰীৰ কু-অভিপ্ৰায় আৰু কু-চিন্তাৰ কোনো সীমা নাই। আজি তেওঁৰ লালকিল্লাৰ ভাষণত এই কথা সম্পূৰ্ণৰূপে পৰিস্ফুট হৈছে।”
তেওঁ অভিযোগ কৰে, ‘আমাৰ হাতত এতিয়াও “সাম্প্ৰদায়িক নাগৰিক সংহিতা” আছে বুলি কোৱাটো হিন্দু ব্যক্তিগত আইনৰ সংস্কাৰৰ আটাইতকৈ ডাঙৰ সমৰ্থক ড০ আম্বেদকাৰৰ প্ৰতি এক গুৰুতৰ অপমান। এই সংস্কাৰসমূহ ১৯৫০ চনৰ মাজভাগলৈকে বাস্তৱত পৰিণত হয়। এই সংস্কাৰৰ তীব্ৰ বিৰোধিতা কৰিছিল আৰ এছ এছ আৰু জনসংঘই।’
তেওঁ ২০১৮ চনৰ ৩১ আগষ্টত ২১ নং আইন আয়োগে দিয়া পৰিয়াল আইন সংস্কাৰৰ পৰামৰ্শ পত্ৰৰ বিবৃতিৰ কথা উল্লেখ কৰে।
জয়ৰাম ৰমেশৰ মতে মোডী চৰকাৰত গঠন হোৱা এই আইন আয়োগে কৈছিল- “ভাৰতীয় সংস্কৃতিৰ বৈচিত্ৰ্যক উদযাপন কৰিব পাৰি আৰু উদযাপন কৰা উচিত হ’লেও এই প্ৰক্ৰিয়াত সমাজৰ নিৰ্দিষ্ট গোট বা দুৰ্বল শ্ৰেণীক বঞ্চিত কৰা উচিত নহয়। এই সংঘাতৰ সমাধানৰ ক্ষেত্ৰতো বঞ্চিত হয়।” গতিকে এই আয়োগে এনে আইন বিবেচনা কৰিছে যিবোৰ একেধৰণৰ নাগৰিক সংহিতাৰ ব্যৱস্থা কৰাৰ পৰিৱৰ্তে বৈষম্যমূলক আৰু যিবোৰ এই পৰ্যায়ত প্ৰয়োজনীয় বা বাঞ্ছনীয়ও নহয়।
বেছিভাগ দেশেই পাৰ্থক্যক স্বীকৃতি দিয়াৰ দিশত আগবাঢ়িছে আৰু কেৱল পাৰ্থক্যৰ অস্তিত্বই বৈষম্যৰ ইংগিত নিদিয়ে, বৰঞ্চ ই এক শক্তিশালী গণতন্ত্ৰৰ চিন।
স্বাধীনতা দিৱসৰ দিনা বৃহস্পতিবাৰে লালকিল্লাৰ প্ৰাচীৰৰ পৰা দিয়া ভাষণত প্ৰধানমন্ত্ৰী নৰেন্দ্ৰ মোদীয়ে দেশত ধৰ্মনিৰপেক্ষ নাগৰিক সংহিতা (SCC)ৰ তীব্ৰ পোষকতা কৰি ভাৰতক ‘উন্নত ৰাষ্ট্ৰ’ হিচাপে গঢ়ি তোলাৰ লগতে ‘এটা ৰাষ্ট্ৰ, এক নিৰ্বাচন’ কৰিবলৈ আহ্বান কৰা হৈছে।
তেওঁ কয়, ‘দেশৰ এক বৃহৎ অংশই বিশ্বাস কৰে যে আমি যি নাগৰিক সংহিতাৰ অধীনত জীয়াই আছো সেয়া আচলতে সাম্প্ৰদায়িক আৰু বৈষম্যমূলক সংহিতা। মই বিচাৰো যে দেশত এই সন্দৰ্ভত এক গুৰুতৰ আলোচনা হওক আৰু সকলোৱে নিজৰ নিজৰ মতামত ব্যক্ত কৰিব লাগে।”
