গুৱাহাটী মহানগৰীত পৱন হাজৰিকা নামৰ এজন খিলঞ্জীয়া যুৱকৰ আত্মহত্যাৰ ঘটনাই ৰাজ্যজুৰি তীব্ৰ চাঞ্চল্যৰ সৃষ্টি কৰিছে। ঘটনাৰ পাছত সদৌ অসম ছাত্ৰ সন্থা (আছু)য়ে এই কাণ্ডক “অসমীয়াৰ ওপৰত অনা-অসমীয়া লবীৰ ষড়যন্ত্ৰ” বুলি অভিহিত কৰি তীব্ৰ ক্ষোভ প্ৰকাশ কৰিছে।

আত্মহনন কৰা পৱন হাজৰিকা, লখিমপুৰ জিলাৰ নাৰায়ণপুৰৰ ধলপুৰ অঞ্চলৰ বাসিন্দা, গুৱাহাটীত এফিনিটি ক্লাছেছ নামৰ শৈক্ষিক প্ৰতিষ্ঠান চলাইছিল। তেওঁ অংকিত আগৰৱালা নামৰ এজন অনা-অসমীয়া ব্যৱসায়ীক সৈতে অংশীদাৰিত্বত এই কোচিং ইনষ্টিটিউটটো আৰম্ভ কৰিছিল। পৰিয়ালৰ দাবী অনুসৰি, পৰৱৰ্তী সময়ত অংকিত আগৰৱালাৰ মানসিক অত্যাচাৰ আৰু আৰ্থিক চাপৰ বাবেই হাজৰিকাই আত্মহত্যাৰ দৰে সিদ্ধান্ত ল’বলৈ বাধ্য হয়।

পৱন হাজৰিকাৰ পিতৃয়ে দাখিল কৰা এজাহাৰত অংকিত আগৰৱালাসহ তিনিজন অনা-অসমীয়াৰ নাম উল্লেখ কৰা হৈছে। যদিও অংকিত আগৰৱালাক দিছপুৰ আৰক্ষীয়ে ইতিমধ্যে আটক কৰিছে, বাকী নিলয় আৰু বিকাশ চিছ’ডিয়া নামৰ অভিযুক্ত দুজন এতিয়াও মুকলি।

ঘটনাটোৰ প্ৰতি চৰকাৰী গুৰুত্বৰ অভাৱক লৈ আজি আছুৰ সাধাৰণ সম্পাদক সমীৰণ ফুকনে এক ফেচবুক পোষ্টযোগে বিস্ফোৰক মন্তব্য কৰে। তেওঁ কয় —
“পৱন হাজৰিকাই চালনা কৰা কোচিং চেন্টাৰৰ জনপ্ৰিয়তাই অনা-অসমীয়া লবীৰ স্বাৰ্থ বিঘ্নিত কৰিছিল, যাৰ ফলত তেওঁক লক্ষ্য কৰি মানসিক যন্ত্ৰণা আৰু ষড়যন্ত্ৰ চলোৱা হয়। এই কথাবোৰ তেওঁ নিজৰ ছুইচাইড নোটত স্পষ্টকৈ লিখি গৈছে।”

ফুকনে তীব্ৰ সতৰ্কবাণী দিয়াকৈ কয় —
“ব্যৱসায় কেৱল অনা-অসমীয়াইহে কৰিব, অসমীয়াই নোৱাৰে—এই মানসিকতাৰ বিৰুদ্ধে ছাত্ৰ সমাজ সজাগ। যি কোনো ব্যক্তি বা গোটে অসমীয়া যুৱকৰ ব্যৱসায় ধ্বংসৰ অপচেষ্টা কৰিব, তেওঁলোকে প্ৰত্যুত্তৰৰ বাবে সাজু থাকিব লাগে।”

আছুৰ দাবী — এজাহাৰত উল্লেখ কৰা তিনিও জনক তদন্তৰ আওতালৈ আনিব লাগিব, কেৱল অংকিত আগৰৱালাক গ্ৰেপ্তাৰ কৰি দায় সমাপ্ত হোৱা বুলি ধৰা নাযায়।

ফুকনে লগতে উল্লেখ কৰে, “অসমত শিক্ষাৰ নামেৰে কোটি কোটি টকাৰ মুনাফা লুটিছে কিছুমান অনা-অসমীয়া লবীয়ে। এতিয়া শিক্ষাৰো সিন্ডিকেট চলাবলৈ সাজু হৈছে। এনে গোটবোৰক শিক্ষা ক্ষেত্ৰত একচলীয়া আধিপত্য প্ৰতিষ্ঠা কৰিবলৈ অনুমতি দিয়া নাযায়।”

পৱন হাজৰিকাৰ মৃত্যুৰ ক্ষেত্ৰত ছুইচাইড নোটত স্পষ্টকৈ উল্লেখ কৰা হৈছে ৬০ লাখ টকাৰ লেনদেন, যাক কেন্দ্ৰ কৰি অংকিত আগৰৱালাই বাৰে বাৰে মানসিক হাৰাশাস্তি কৰি আহিছিল। তেওঁ দক্ষিণ গাঁৱত থকা ঘৰ নং ৪২ত আত্মহত্যা কৰে, আৰু ঘটনাস্থলীত উদ্ধাৰ হোৱা নোটে মৃত্যুৰ পেছত থকা কাৰণসমূহ প্ৰকাশ কৰিছে।

মন্ত্ৰ্যজনকভাৱে, এই গম্ভীৰ ঘটনাটোৰ বিষয়ে চৰকাৰী চৰ্চা আৰু গণমাধ্যমৰ এক অস্বাভাৱিক নিৰ্বিকাৰতা ৰাইজৰ দৃষ্টিগোচৰ হৈছে। ফুকনে কয় —
“অসমত অসমীয়াৰ অধিকাৰ ৰক্ষাৰ সময় আহি পৰিছে। আমরা নীৰৱ দৰ্শক হৈ থাকিলে অনাগত সময়ত আৰু বহু অসমীয়া যুৱক এইদৰে ষড়যন্ত্ৰৰ বলি হ’ব।”