বড়োলেণ্ডৰ ৰাজনৈতিক পটভূমিত নতুন অধ্যায়ৰ সূচনা হৈছে। বৰবৰীস্থিত প্ৰাক্তন এনডিএফবি শিবিৰত আজি অল্টাৰনেটিভ পাৰ্টি অফ বড়োলেণ্ড (এপিবি) নামেৰে নতুন ৰাজনৈতিক দল গঠনৰ ঘোষণা কৰা হ’ল।

কিয় গঠন হ’ল নতুন দল?
প্ৰাক্তন এনডিএফবি নেতা ৰঞ্জন দৈমাৰীৰ সেউজ সংকেত আৰু সহস্ৰাধিক কেডাৰ-নেতাৰ সমাৱেশত অনুষ্ঠিত সভাত দলটোৰ জন্ম হয়। দলৰ সভাপতি ড০ অঞ্জলী দৈমাৰীয়ে কয়, “বিটিআৰ শান্তি চুক্তিৰ পিছতো প্ৰাক্তন বিদ্ৰোহীসকলৰ সমস্যা অমীমাংসিত হৈ আছে। চুক্তি কাগজত সীমাবদ্ধ, প্ৰকৃত শান্তি অহা নাই। ৰাস্তা-দলং নিৰ্মাণেই শান্তি নহয়; আমাৰ ত্যাগীসকলক সন্মান আৰু অধিকাৰ প্ৰদান হ’ল নে?” তেওঁৰ মতে, চুক্তিৰ পিছতো একাংশ নেতা জেলত থাকিবলগীয়া হৈছে, যািয়ে নতুন ৰাজনৈতিক পথৰ প্ৰয়োজনীয়তা জন্মাইছে।

নেতৃত্ব আৰু লক্ষ্য
দলটোৰ ২৭ সদস্যৰ কেন্দ্ৰীয় সমিতিত ড০ অঞ্জলী দৈমাৰী সভাপতি, প্ৰদীপ কুমাৰ ব্ৰহ্ম প্ৰশাসনিক সম্পাদক, জগদীশ বসুমতাৰী সাংগঠনিক সম্পাদক হিচাপে দায়িত্বত আছে। মুখপাত্ৰৰ দায়িত্ব পালন কৰিব বনচো দৈমাৰী আৰু জাকিৰ হুছেইন প্ৰামানিকে। দলটোৰ মূল লক্ষ্য হৈছে বড়োলেণ্ডৰ সকলো জাতি-জনগোষ্ঠীৰ সমন্বয়ত শান্তি আৰু উন্নয়নৰ পথত অগ্ৰসৰ হোৱা। ড০ দৈমাৰীয়ে স্পষ্ট কৰে, “আমি ধন বিলোৱা বা মিছা আশ্বাসৰ ৰাজনীতি নকৰোঁ। সত্য আৰু ন্যায়ৰ পথত সংগ্ৰাম কৰিম।”

নির্বাচনী পৰিকল্পনা
এপিবিয়ে আগন্তুক বিটিআৰ (বড়োলেণ্ড টেৰিটৰিয়েল ৰিজিয়ন) নিৰ্বাচনত এককভাৱে প্ৰতিদ্বন্দ্বিতা কৰাৰ ঘোষণা কৰিছে। দলটোৰ মতে, বৰ্তমানৰ শাসক দলসমূহে ক্ষমতাকেন্দ্ৰিক হৈ প্ৰকৃত সমস্যা আওকান কৰিছে। সভাত কাৰ্বি আংলঙৰ অল পাৰ্টি হিলচৰ নেতা জন ইংতি কাথাৰো উপস্থিতিৰে আঞ্চলিক সহমৰ্মিতাৰ ইংগিতো পোৱা গৈছে।

শান্তি চুক্তিক “অপূৰ্ণ” বুলি অভিহিত কৰি এপিবিয়ে জোৰ দিছে যে ৰাজনৈতিক স্বায়ত্ততা আৰু সন্মানৰ বাবে সংগ্ৰাম অব্যাহত ৰাখিব। ড০ দৈমাৰীয়ে কয়, “আমি কাৰো শত্রু নহয়, কিন্তু অধিকাৰৰ বাবে নীতিৰ যুঁজ দিম।” বড়োলেণ্ডৰ ৰাজনীতিত এই নতুন দলৰ প্ৰভাৱ কেনেকুৱা হয়, চকু ৰাখিবলৈ সমীকৰ্ণই ৰৈছে।