Brahmaputra Times
দুদিনীয়া ভ্ৰমণসূচীৰ অংশ হিচাপে মঙলদৈত উপস্থিত প্ৰদেশ কংগ্ৰেছৰ নৱ-নিযুক্ত সভাপতি তথা সাংসদ গৌৰৱ গগৈয়ে আজি কংগ্ৰেছ দলৰ এক বিশেষ সভাত অংশগ্ৰহণ কৰে। সভাত উপস্থিত নেতা-কৰ্মীসকলক উদ্দেশি কৰি তেওঁ বিজেপি, আৰএছএছ আৰু ৰাজ্য চৰকাৰৰ ওপৰত একৰাৰপৰা এক বিস্ফোৰক মন্তব্য কৰে।
সভাখনত গৌৰৱ গগৈয়ে কংগ্ৰেছৰ চিহ্নত বিগত পঞ্চায়ত নিৰ্বাচনত জয়লাভ কৰা প্ৰাৰ্থীসকলক সম্বৰ্ধনা জনোৱাৰ উপৰিও, বিজেপিৰ “দুৰ্নীতি”ৰ বিৰূদ্ধে দলীয় কৰ্মীসকলক ৰাইজৰ মাজলৈ নামিবলৈ আহ্বান জনায়।
“বহিঃৰাজ্যৰ আৰএছএছ নেতাই অসমৰ পৰিৱেশ দুষিত কৰি তুলিছে,” বুলি মন্তব্য কৰি গগৈয়ে কয়, “এইসকল নেতাই অসমলৈ আহি সাম্প্ৰদায়িকতা উস্কাই অসমৰ শান্তি-সম্প্ৰীতি বিনষ্ট কৰাৰ ষড়যন্ত্ৰ আঁকিছে। আমি এইটো কেতিয়াও হ’ব নিদিও।” তেওঁ অসম আৰক্ষীক আহ্বান জনায় যাতে বহিঃৰাজ্যৰ পৰা অহা আৰএছএছ নেতা-কৰ্মীৰ নাম পঞ্জীয়ন কৰা হয়।
মঙলদৈৰ বিধায়ক বসন্ত দাসৰ বিজেপি লৈ সোঁৱৰ সম্ভাৱনাক লৈ সোধা প্ৰশ্নৰ উত্তৰত গৌৰৱ গগৈয়ে তীব্ৰ কটাক্ষ কৰে: “কংগ্ৰেছ দলত থাকি দেহত বিজেপি ভাইৰাছ থকা নেতাসকলক ভাল ট্ৰিটমেণ্ট দিব লাগিব, কিন্তু যিসকলৰ ভাইৰাছ বেছি তেখেতলোকক অপাৰেচন কৰিব লাগিব।”
ধুবুৰী জিলা সন্দৰ্ভত মুখ্যমন্ত্ৰীৰ মন্তব্যক সমৰ্থন জনোৱাৰ বাবে প্ৰদ্যুৎ বৰদলৈকো গগৈয়ে লক্ষ্য কৰে। তেওঁ কয় যে গৃহ বিভাগ বৰ্তমান ব্যৰ্থ, আৰু চৰকাৰেই এই অস্থিৰতাৰ মূল আঁতৰাংগ। “চোৰাংচোৱাই তথ্য দিব নোৱাৰে, কংগ্ৰেছৰ কথামাত্র জানিব বিচাৰিছে চৰকাৰে,” বুলি কটাক্ষ কৰে গগৈয়ে।
তেওঁ চৰকাৰৰ কেন্দ্ৰীকৰণৰ ওপৰতো মন্তব্য কৰে — “আজিৰ দিনত সকলো ধন-সম্পত্তি, শক্তি মাত্ৰ মুখ্যমন্ত্ৰী আৰু দুই-তিনিজন ব্যক্তিৰ হাতত কেন্দ্ৰীভূত হৈ পৰিছে। সাধাৰণ ৰাইজৰ হাতত একো নাই।” তেওঁ হুঁচিয়াৰেৰে কয় — “২০২৬ চনত এখন ডাঙৰ যুদ্ধ হব।”
এনে মন্তব্যৰ মাজতে, এনআৰচি সন্দৰ্ভত মুখ্যমন্ত্ৰীৰ বক্তব্যক “অ-সাংবিধানিক” বুলি আখ্যা দিয়ে কংগ্ৰেছ সভাপতি গগৈয়ে।
সভাত জিলা সভাপতি মাধৱ ৰাজবংশী, কংগ্ৰেছ নেতা কন্দৰ্প কলিতা, ৰিজুমণি তালুকদাৰ, দুলাল হীৰা, ইলিয়াছ আলীসহ বহু কংগ্ৰেছ নেতা-কৰ্মী উপস্থিত থাকে।
উল্লেখযোগ্য যে, শনিবাৰে গধূলিতে মঙলদৈ উপস্থিত হৈ গৌৰৱ গগৈয়ে আবৰ্ত ভৱনত বিভিন্ন দল-সংগঠনৰ সৈতে বেছ কিছু গুৰুত্বপূর্ণ আলোচনা কৰে।
