গুৱাহাটীঃ বাংলাদেশৰ হিংসাত্মক পৰিস্থিতি, বিশেষকৈ সংখ্যালঘু হিন্দুৰ ওপৰত সংঘটিত কথিত আক্ৰমণৰ ঘটনাক লৈ গভীৰ উদ্বেগ প্ৰকাশ কৰে ৰাজ্যৰ মুখ্যমন্ত্ৰী হিমন্ত বিশ্ব শৰ্মাই।

এই সন্দৰ্ভত সংবাদ মাধ্যমৰ সৈতে হোৱা কথা-বতৰাক কংগ্ৰেছকো আক্ৰমণৰ লক্ষ্য কৰি লয় হিমন্ত বিশ্ব শৰ্মাই। গাজা সংঘাতৰ সময়ত সৰৱ হৈ পৰা কংগ্ৰেছ বৰ্তমান বাংলাদেশত হিন্দুৰ ওপৰত চলি থকা নিৰ্যাতনক লৈ নিমাত কিয় বুলিও প্ৰশ্ন কৰে মুখ্যমন্ত্ৰীগৰাকীয়ে।

শৰ্মাই কয় যে বাংলাদেশৰ পৰিস্থিতি চিন্তনীয়। প্ৰধানমন্ত্ৰীয়ে কূটনৈতিক মাধ্যমেৰে বিষয়টো সম্বোধন কৰি ক্ৰমান্বয়ে পৰিস্থিতিৰ উন্নতি সাধন কৰিব বুলি তেওঁ আস্থা প্ৰকাশ কৰে। তেওঁ কংগ্ৰেছ দল আৰু বিশেষকৈ প্ৰিয়ংকা গান্ধীয়ে হিন্দুক প্ৰভাৱিত কৰা বিষয়তকৈ মুছলমান বিষয়ক অগ্ৰাধিকাৰ দিয়াৰ অভিযোগ উত্থাপন কৰে। তেওঁ কয়, “কংগ্ৰেছে প্ৰমাণ কৰিছে যে পৃথিৱীৰ যিকোনো ঠাইতে মুছলমানৰ বাবে যদি কিবা সমস্যা থাকে তেন্তে তেওঁলোক তেওঁলোকৰ বাবেই আছে। কিন্তু হিন্দু যদি বিপদত পৰে তেন্তে তেওঁলোক মৌন হৈ থাকে।” তেওঁ দলটোৱে জাতিৰ ভিত্তিত হিন্দুসকলক বিভাজন কৰিবলৈ চেষ্টা কৰাৰ অভিযোগ উত্থাপন কৰে।

মুখ্যমন্ত্ৰী শৰ্মাই সীমান্তৰ সিপাৰে নিৰ্যাতনৰ পৰা পলায়ন কৰা লোকসকলক আশ্ৰয় দিয়াৰ জটিলতাসমূহৰ ওপৰত আলোকপাত কৰি কয় যে যদিও ভাৰত চৰকাৰে শৰণাৰ্থীৰ আগমনৰ অনুমতি দিয়া নাই, তথাপিও ইয়াৰ দীৰ্ঘম্যাদী সমাধান নিহিত হৈ আছে বাংলাদেশী হিন্দুসকলৰ নিজৰ দেশৰ ভিতৰত সুৰক্ষা নিশ্চিত কৰাত। ‘ভাৰত চৰকাৰে সীমান্তৰ সিপাৰৰ কোনো লোকক গ্ৰহণ কৰিবলৈ অনুমতি দিয়া নাই, ১-২ কোটি মানুহক অনুমতি দিব নোৱাৰিব।’- শৰ্মাই কয়। এই স্পৰ্শকাতৰ বিষয়টো সন্দৰ্ভত কেন্দ্ৰীয় চৰকাৰে লোৱা যিকোনো সিদ্ধান্ত অসমে পালন কৰিব বুলি তেওঁ আশ্বাস দিয়ে।