ৰাজ্য চৰকাৰে বীৰ লাচিত সেনাৰ বিতৰ্কিত নেতা শৃংখল চলিহাক দুজনকৈ অস্ত্ৰধাৰী দেহৰক্ষী প্ৰদান কৰিছিল৷ কিন্তু দেহৰক্ষী ল’বলৈ মান্তি নহ’ল শৃংখল চলিহা৷ এই কথা খোদ এটা ফেচবুক পোষ্টত উল্লেখ কৰিছে চলিহাই৷ ফেচবুকত দিয়া এটা পোষ্টত চলিহাই কয় যে মোক অসম আৰক্ষীৰ দেহৰক্ষীৰ প্ৰয়োজন নাই। দুয়োজনক মই স-সন্মানেৰে ঘৰলৈ যাবলৈ দিছো। বীৰ লাচিত সেনাৰ সৈন্যৰ সাহস আৰু ত্যাগে মোৰ নিৰাপত্তা। ধন্যবাদ৷ জয় আই অসম৷ শেহতীয়াকৈ উজনি অসমৰ পৰা মিঞা হাটাও অভিযানত নেতৃত্ব দিছিল শৃংখল চলিহাই৷ সন্দেহজনক বিদেশীৰ বিৰুদ্ধে বিতৰ্কিত মন্তব্য প্ৰদান কৰি আহিছে৷ সমানে চলিহাই চৰকাৰৰ নিৰ্দেশত মন্তব্য তথা কাম কৰি থকা বুলি অভিযোগ উত্থাপন হৈ আহিছে৷ যাৰ ফলত ৰাজ্য চৰকাৰে চলিহাৰ জীৱনৰ নিৰাপত্তা নিশ্চিত কৰিবলৈ দুই দেহৰক্ষী প্ৰদান কৰিছিল৷ ২৬ ছেপ্টেম্বৰত চলিহাৰ ঘৰত উপস্থিত হয় দুই দেহৰক্ষী৷ চলিহাই পিছমুহূৰ্ততে সসন্মানে দেহৰক্ষীক বিদায় দি কয় যে মোক নিৰাপত্তাৰক্ষী প্ৰয়োজন নাই৷ বীৰ লাচিত সেনাৰ সৈনিকেই তেওঁৰ সাহস৷ জানিব পৰা মতে, আজি আকৌ দুজন দেহৰক্ষী দিছে চলিহাক৷ অসম চৰকাৰে কিহৰ সন্দেহত দেহৰক্ষা প্ৰদান কৰিছে এতিয়ালৈকে সেই কথা উল্লেখ কৰা নাই। ‘কা’ আন্দোলনৰ সময়ত কাৰাগাৰত ৰখা চলিহাক বিজেপি চৰকাৰখন হঠাতে শৃংখল চলিহাৰ জীৱনৰ নিৰাপত্তাক লৈ ইমান সচেতন হোৱা বিষয়টোৱে চাঞ্চল্যৰ সৃষ্টি কৰিছে৷