গুৱাহাটীঃ ৰাজ্যসভাৰ বাবে প্ৰাৰ্থিত্ব বিচাৰি আগবাঢ়ি অহা নাই বিৰোধী ঐক্যমঞ্চ অথবা কংগ্ৰেছ দলৰ কোনো নেতা। সংবাদ মাধ্যমৰ সন্মুখত এই কথা সদৰী কৰিছে প্ৰদেশ কংগ্ৰেছৰ সভাপতি ভূপেন বৰাই।

দেওবাৰে সংবাদ মাধ্যমৰ সৈতে হোৱা মুখামুখিৰ সময়ত ভূপেন বৰাই অকপটে স্বীকাৰ কৰে যে বিৰোধীৰ সংখ্যাৰ পৰিপ্ৰেক্ষিতত ৰাজ্যসভাত কংগ্ৰেছ জয়ী হোৱাটো সহজ নহয়।

বৰাই কয়, ”বিৰোধী ঐক্যমঞ্চৰ কেইবাগৰাকীও নেতাক মই সুধিছো ৰাজ্যসভাৰ বাবে প্ৰাৰ্থিত্ব বিচাৰে নেকি, লোকসভা নিৰ্বাচিত প্ৰাৰ্থিত্ব প্ৰদানক লৈ আমাৰ কিছু অসুবিধা হৈছিল, কিন্তু ৰাজ্যসভাৰ বাবে কোনোৱে প্ৰাৰ্থিত্ব বিচাৰিছে আমি এই বিষয়ে চিন্তা-চৰ্চা কৰিম। কিন্তু কোনো আগবাঢ়ি অহা নাই।’’

ইফালে ৰাজ্যসভাত কংগ্ৰেছৰ জয় সহজ নহ’লেও শীঘ্ৰে অনুষ্ঠিত হ’বলগীয়া ৫ টা বিধানসভা সমষ্টিৰ উপ-নিৰ্বাচনত কংগ্ৰেছ আৰু বিৰোধী ঐক্যমঞ্চই একেলগে প্ৰতিদ্বন্দ্বিতা আগবঢ়াব বুলিও মন্তব্য কৰে ভূপেন বৰাই। ৰাইজৰ দল আৰু চি পি আই এমে উপ-নিৰ্বাচনৰ বাবে প্ৰাৰ্থিত্ব বিচৰা বুলিও সংবাদ মাধ্যমৰ সন্মুখত সদৰী কৰে বৰাই।