২০১৯ চনৰ ১২ ডিচেম্বৰৰ দিনটোক লৈ আজি ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈয়ে সংবাদমেল সম্বোধন কৰি পুনৰ ‘কা’ মানি লোৱা নহয় বুলি হুংকাৰ দিয়ে৷ অখিল গগৈয়ে গুৱাহাটীত সংবাদমেল সম্বোধন কৰি কয় যে ২০২৯ চনৰ ১২ ডিচেম্বৰত চৰকাৰে মোক যোৰহাটত গ্ৰেপ্তাৰ কৰিছিল৷ ২০১৯ চনৰ ১১ ডিচেম্বৰত সংসদত যেতিয়া ‘কা’ গৃহীত হৈছিল সিদিনা যোৰহাটত বিশাল প্ৰতিবাদী কাৰ্যসূচীত আছিলো৷ তাৰ পৰাই চৰকাৰে মোক গ্ৰেপ্তাৰ কৰি ১ বছৰ ৯ মাহ সময় মোক জেলত ৰাখি থৈছিল৷ মই ওলাই অহাৰ পিছতো ‘কা’ৰ বিৰোধিতা কৰিবলৈ এৰি দিয়া নাছিলো৷ আজিও আমি ‘কা’ নামানো৷ ভাৰত চৰকাৰে গৃহীত কৰিছে৷ অসমৰ মানুহে ‘কা’ কেতিয়াও নামানে৷ ‘কা’ এখন অবৈধ আৰু ক’লা আইন বুলি ঘোষণা কৰি গগৈয়ে কয় যে কৃষক মুক্তি সংগ্ৰাম সমিতি আৰু বিভিন্ন দল-সংগঠনে উচ্চতম ন্যায়ালয়ত গোচৰ তৰি থৈছে৷ কা’খন এখন বিতৰ্কিত আইন৷ ন্যায়ালয়ৰ বিচাৰাধীন আইন৷ যিদিনা উচ্চতম ন্যায়ালয়ে ৰায় দিব সিদিনা অসমৰ পক্ষত ৰায় দিব৷ অসমত ‘কা’ প্ৰযোজ্য হ’ব নালাগে বুলি নিশ্চয়কৈ ৰায় দিব৷ ইতিমধ্যে উচ্চতম ন্যায়ালয়ে ১৯৭১ চনৰ ২৫ মাৰ্চক নাগৰিকত্বৰ ভিত্তিবৰ্ষ কৰি ৰায় দিছে৷ এইটো ৰায়দিয়া উচ্চতম ন্যায়ালয়ে ‘কা’ ইয়াত নালাগে বুলি কোৱাটো খাতাং৷ অখিল গগৈয়ে হিমন্ত বিশ্ব শৰ্মা আৰু নৰেন্দ্ৰ মোদীয়ে হিন্দু বাংলাদেশীৰ বিৰুদ্ধে যিমানে ওকালতি নকৰক কিয় অসমৰ মানুহে ‘কা’ কেতিয়াও নামানে বুলি স্পষ্ট কৰে৷ এদিন নহয় এদিন অসমৰ মানুহে অসমৰ পৰা ‘কা’ খন দলিয়াই, আতৰাই পঠিয়াব বুলি দাবী কৰি অখিল গগৈয়ে কয় যে হিমন্ত বিশ্ব শৰ্মা আৰু বিজেপিয়ে কৈছে যে ‘কা’ খন অহাৰ পিছত অসমত কেৱল ৮জন মানুহেহে নাগৰিকত্ব পাইছে৷ ৮ জন মানুহক নাগৰিকত্ব দিবলৈ এখন আইনৰ দৰকাৰ নাই৷ বিজেপিয়ে কৈছে অসমলৈ বিদেশী অহাই নাই৷ কিন্তু বৰাকত উপ-নিৰ্বাচন অনুষ্ঠিত হোৱা ধলাই সমষ্টিত বিজেপিৰ যিজন প্ৰাৰ্থী তেওঁ হিন্দু বাংলাদেশী৷ ১৯৮৪ চনত ভাৰতলৈ আহিছে৷ বাংলাদেশৰ হিন্দু নাগৰিক এজনক এইবাৰ তাত বিজেপিয়ে প্ৰাৰ্থী হিচাপে থিয় কৰালে৷ এজন বাংলাদেশী এইবাৰ অসম বিধানসভালৈ জয়ী হৈ আহিছে৷ যি কথা বৰাকৰ সকলো মানুহে জানে৷ বহু হিন্দু বাংলাদেশী অসমত সোমাই আছে৷