আজি অসম বিধানসভাৰ বাজেট অধিৱেশনৰ তৃতীয় দিনত মুখ্যমন্ত্ৰী হিমন্ত বিশ্ব শৰ্মা আৰু শিৱসাগৰৰ বিধায়ক অখিল গগৈৰ মাজত প্রায় ৮ মিনিটীয়া তীব্ৰ তৰ্কযুদ্ধৰ জন্ম দিয়ে। উন্নয়নৰ পৰিৱৰ্তে ইজনে-সিজনৰ ব্যক্তিগত জীৱনলৈ লক্ষ্য ৰাখি হোৱা এই কথাৰ কট-কটিয়ে সদনত উত্তাল পৰিৱেশ সৃষ্টি কৰে।

কিয় উত্তপ্ত হ’ল সদন?
মুখ্যমন্ত্ৰীয়ে সদনত বক্তৃতা দি থকাৰ সময়তে অখিল গগৈই থিয় দি প্ৰশ্ন তোলে—২০২৬ চনলৈ মুখ্যমন্ত্ৰীৰ নীতি সলনি হ’ব বুলি কিয় আগতে নকয়? উত্তৰত হিমন্তই কয়, “কংগ্ৰেছৰ দিনত মই শক্তিশালী মন্ত্ৰী আছিলোঁ, আপোনালোকে তৰুণ গগৈক দুৰ্বলী বুলি কৈ তেওঁৰ সন্মান হানি কৰিলে। মৃত ব্যক্তিজনক ইমান সমালোচনা কৰা উচিত নহয়।” অখিলে প্ৰত্যুত্তৰ দিয়ে, “আপুনি গোটেই কথাকে ওলোটা কৈছে। ১০৮ সেৱাৰ দৰে কেন্দ্ৰীয় আঁচনিৰ ক্ৰেডিট আপুনি কিয় লয়?”

পত্নী-পৰিয়ালৰ কথালৈ নামি আহে তৰ্ক

তৰ্কযুদ্ধই তীব্ৰ ৰূপ লয় যেতিয়া অখিল গগৈই মুখ্যমন্ত্ৰীৰ পত্নীৰ প্ৰাইভেট স্কুল ক লৈ প্ৰশ্ন তোলে। উত্তৰত হিমন্তই আক্রমণাত্মক হৈ কয়, “দুৰ্বল মানুহে মাইকী মানুহক আক্ৰমণ কৰে। আপোনাৰ পত্নীয়ে বি. বৰুৱা কলেজত চাকৰি পোৱাৰ প্ৰক্ৰিয়াটোৱেই প্ৰশ্নবিদ্ধ। পেপাৰত সেই খবৰ ওলাইছিল।” অখিলে চেলেঞ্জ দিয়ে, “ডকুমেন্ট দিয়ক! মোৰ পত্নীয়ে আপোনাতকৈ বেছি দৰমহা পায়। আপুনি ৰাজনীতিৰে সম্পত্তি গোটালে!”

দলীয় সমৰ্থকৰ প্ৰতিক্ৰিয়া
হিমন্তই ক্ৰোধিত হৈ কয়, “এপিএছচিৰ কেলেঙ্কাৰীত আপোনাৰ নাম আছে, মোৰ নাই। আদালতত মানহানিৰ গোচৰ চলি থকা আপুনি ইয়াত কিয় কথা কয়?” অখিলে উলটি প্ৰশ্ন কৰে, “গোচৰৰ ডকুমেন্ট আদালতত দিয়ক! আপোনাৰ নাম কেলেঙ্কাৰীৰ তালিকাত নথকাটোৱেই সন্দেহজনক।”

অধ্যক্ষৰ হস্তক্ষেপ আৰু সদনৰ পৰিৱেশ
অধ্যক্ষই অখিলক বহিবলৈ নিৰ্দেশ দিলেও তৰ্কযুদ্ধ বন্ধ নহ’ল। শাসকদলীয় বিধায়কে টেবুল থপৰিয়াই সমৰ্থন জনায়, বিৰোধীপক্ষৰ হাঁহিয়েই উত্তৰ দিয়ে। শেষত মুখ্যমন্ত্ৰীয়ে হাউচ কমিটি গঠনৰ প্ৰস্তাৱ দিয়াত অখিলে কয়, “আপুনি আদালতৰ বিষয় বিধানসভাত আলোচনা কৰিব নোৱাৰে।”

ৰাজনৈতিক বিশেষজ্ঞসকলে এই তৰ্কযুদ্ধক “অসমৰ ৰাজহেৰে চলা অধিৱেশনৰ সময় অপচয়” বুলি সমালোচনা কৰিছে। ৰাজ্যৰ গুৰুত্বপূর্ণ বিষয়ৰ পৰিৱৰ্তে ব্যক্তিগত আক্ৰমণে ৰাইজৰ আশা-আকাংক্ষাক পৃষ্ঠভূমিলৈ ঠেলি দিয়া বুলি মত পোষণ কৰিছে।

বাজেট অধিৱেশনৰ এই দিনটোত ৰাজ্যৰ অৰ্থনীতিৰ সলনি মুখ্যমন্ত্ৰী আৰু বিৰোধী নেতাৰ ব্যক্তিগত সংঘৰ্ষেই আলোচনাৰ কেন্দ্ৰবিন্দু হৈ পৰিল। ৰাজনৈতিক স্থিতিস্থাপকতাৰ পৰিৱৰ্তে এই ধৰণৰ বাকযুদ্ধে ৰাইজৰ মাজত অসন্তোষৰ সৃষ্টি কৰাটোৱেই স্বাভাৱিক।