গুৱাহাটী চিকিৎসা মহাবিদ্যালয়ৰ মৰ্গত পৰি ৰৈছে এজন অচিনাক্ত যুৱকৰ মৃতদেহ৷ মৃতদেহ চমজি ল’বলৈ কোনো অভিভাৱক অহা নাই৷ আৰক্ষীয়েও মৃতদেহটো এই পৰ্যন্ত চিনাক্ত কৰিব পৰা নাই৷ যাৰ বাবে চাৰিদিনে মৰ্গত ৰাখি থোৱা হৈছে মৃতদেহটো৷ গুৱাহাটীত ১২ জানুৱাৰীত সংঘটিত এক পথ দুৰ্ঘটনাত অচিনাক্ত যুৱকজনৰ মৃত্যু হৈছিল৷ জীৱিত অৱস্থাত গুৱাহাটী চিকিৎসা মহাবিদ্যালয়লৈ নিয়া হৈছিল যদিও কিছু সময় পিছতে মৃত্যুক আকোৱালি লয়৷ মৰণোত্তৰ পৰীক্ষাৰ অন্তত মৃতদেহটো গুৱাহাটী চিকিৎসা মহাবিদ্যালয়ৰ মৰ্গত আছে যদিও এই পৰ্যন্ত আৰক্ষীয়ে চিনাক্ত কৰিব পৰা নাই আৰু অভিভাৱকে আৰক্ষীৰ সৈতে যোগাযোগ কৰা নাই৷ যাৰ বাবে বিমোৰত পৰিছে গুৱাহাটী আৰক্ষী৷ জানিব পৰা মতে, ১২ জানুৱাৰীৰ পুৱা বশিষ্ঠ আৰক্ষী থানাৰ অন্তৰ্গত ২৭নং ৰাষ্ট্ৰীয় ঘাইপথৰ বেহাৰবাৰী উৰণীয়া সেঁঁতুত এখন তীব্ৰবেগী অল্টই ৰখাই থোৱা পিকআপ ভানত খুন্দা মাৰিছিল৷ ফলত দুয়োখন বাহনত থকা তিনিজন লোক গুৰুতৰভাৱে আঘাতপ্ৰাপ্ত হয়। আঘাতপ্ৰাপ্ত আটাইকেইজন লোকক গুৱাহাটী চিকিৎসা মহাবিদ্যালয়লৈ প্ৰেৰণ কৰা হৈছিল যদিও অচিনাক্ত যুৱকজনৰ মৃত্যু হয়। প্ৰায় ৩০ বছৰীয়া অচিনাক্ত যুৱকজনে লংপেণ্ট আৰু এটা হাফ জেকেট পিন্ধি আছিল বুলি আৰক্ষীয়ে প্ৰকাশ কৰিছে। যদি অসমৰ কোনো ঠাইৰ প্ৰায় ৩০ বছৰীয়া যুৱক বিগত তিনি-চাৰিদিন ধৰি নিৰুদ্দেশ হৈ আছে তেন্তে গুৱাহাটী আৰক্ষীৰ সৈতে যোগাযোগ কৰিব পাৰিব৷